اسلام آباد۔ 30جولائی (اے پی پی) ڈپٹی اسپیکر قومی اسمبلی قاسم خان سوری پارینے کہ پاکستان و اوغانستان نا مذہبی و دودوربیدگی قدر اسہ وڑ ءِ، نن اسہ سوگو ءُ اوغانستان اسے نا خواہندار اُن ہراٹی فیصلہ اوغانستان نا مخلوق تینٹ کے، اوغان باہمت ءُ مخلوق اسے ءُ، اواسل شکست ءِ امناکتوس، اوغان امن عمل اٹ پاکستان پبی کڑد ادا کننگ نا کوشست کرے، نن اوغانستان ءِ شون ہلسا ملک اس ہُننگ خوانہ۔ داخیال آتا درشانی ءِ اوپاک اوغان یوتھ فورم نا کنڈآن اڈ ہلوک آ دود آن تران کرسا کرے۔ داوخت آ بنجائی وزیر حوالکاری چوہدری فواد حسین، بنجائی وزیر مذہبی امور پیر نورالحق قادری، وزیر مملکت موسمیاتی بدلی زرتاج گل، وزیراعظم نا خصوصی کمکار شہباز گل تون اوار ایلو اہم شخصیت آک ہم ساڑی ئسر۔ قاسم خان سوری پارے کہ پاکستان و اوغانستان نا مذہبی و دودوربیدگی قدر اسہ وڑ ءِ۔ ننا تاریخی ہیروک کابل آن برسا برصغیر پاک و ہند اٹ تاریخ اس ہلار، حضرت داتا گنج بخش اوغانستان آن دانگیا بس و اسلام نا تبلیغ کرے۔ شیر شاہ سوری کابل آن کلکتہ اسکان 3300کلومیٹر سڑک جوڑکرے۔ اوپارے کہ بدبختی اٹ تدوک آ 40سال اٹی اوغانستان اٹی ظلم و ستم کننگا، کم وود 30لکھ اوغان باہوٹ تدوک آ چل سال آن داڑے رہینگ انگ ءُ، داباہوٹ آتا چناتا پن اوغانستان تون گنڈوک ءِ ولے اوفک اینو اسکان اوغانستان ءِ خنتنو۔ اوپارے کہ نن ہمووخت اسکان مون آ ہِننگ کپنہ ہراتم اسکان اوغانستان اسہ آجو و وتواجہ ملک اس جوڑ مف۔ اوپارے کہ نن اوغانستان ءِ شون ہلسا ملک اس ہُننگ خوانہ۔ اوپارے کہ تدوک آ مسہ سال اٹی اوغانستان نا ہرتپہ غان تعلق تخوک آ بندغ آتے داڑے بٹنگان، اوغانک ننا ایلمک ءُ، نن ہراحالیت آتیان گدرینگ انگ اُن ننے اسہ ایلو ءِ پہہ مننگ نا گرج ءِ۔ اوپارے کہ 40سال انا جنگ و جدل ءِ نن خنانن، نن بارڈر آ جوان ءُ فضااس قائم کننگ خوانہ۔ اوپارے کہ اوغان امن عمل اٹ پاکستان تینا پبی کڑد ءِ ادا کرے۔ ورناتتون مخاطب مرسا ڈپٹی اسپیکر قاسم خان سوری پارے کہ ننا کوشست ءِ کہ اوغانستان اٹی اسہ امنائی حکومت اس مرے ہراٹی فیصلہ اوغانستان نا مخلوق تینٹ کے۔ اوپارے کہ اوغانستان اٹی خراب مروک آ حالیت آتیان پاکستان ہم زہمی ءِ، اوغانستان اٹی امن مریک تو نن ہم شون ہلینہ۔ او مستی پارے کہ پاکستان 57اسلامی ملک آتے ٹی غٹ آن زیات پنی ءُ ملک و ایٹمی واکدار اسے، داجاگہ نا بھلا آبادی ورناتیا تالان ءِ، ننے اوفتے گچینی نا کنڈآ دروئی ءِ۔ داوخت آ بنجائی وزیر مذہبی امور نورالحق قادری پشتو زبان اٹ تران کرے۔
