اسلام آباد۔ 30جولائی (اے پی پی) چیئرمین سینیٹ محمد صادق سنجرانی پاکستان و ایران نا نیام اٹ پارلیمانی رابطہ، واپاری کمکاری و ہڑتوم آ کنڈآتا اقتصادی تعلقداری نا سوگوی آ زور شاغسا پارینے کہ پاکستان و ایران ڈیہہ نا شونداری و شونہالی نا تغ ءِ پورو کننگ کن کوشست کننگ ءُ و ہڑتوم آ ملک آتا مذہبی، دودوربیدگی و راجی مماثلت ہڑتوم آ کنڈآتے مون آ دننگ کن سوگوءُ بنداو اس فراوان کیک۔ چیئرمین سینیٹ داخیال آتا درشانی ءِ ایران نا سفیر سید محمد علی حسینی تون پارلیمنٹ ہاؤس اٹی اوڑدہی ٹی کرے۔ چیئرمین سینیٹ پارے کہ ہڑتوم آ ملک آتا نیام اٹ جہانی کہول آ کمکاری سفت نا قابل ءِ و پاکستان ایران تون تینا تاریخی تعلقداری تے بھازاہمیت ایتک و ننا است خواہی ءِ کہ داتعلقداری تے سیاسی، راجی و اقتصادی کہول آ پین سوگو کننگے۔ چیئرمین سینیٹ پارے کہ پاکستان و ایران مدام اسہ ایلو تون جہانی فورم تیا کمک کرینو و چندی ویل آتیا اسہ وڑنا موقف اختیار کرینو اودفاعی کہول آ کمکاری ءِ ہم بے مٹ گوندانے۔ ایران نا سفیر چیئرمین سینیٹ نا خیال آتیان امنا کرے و پارے کہ ہڑتوم آ ملک آتا نیام اٹ ہڑتوم آ کنڈآتا کمکاری ءِ پین سوگو کننگ نا گرج ءِ۔ اوڑدہی ٹی مکران ڈویژن و خاص وڑاٹ گوادر ءِ ایران نا کنڈآن بجلی نا فراوانی نا کشکنگ نا معاملہ غاہم سجفیر۔ چیئرمین سینیٹ ایران نا حکومت نا گوادر و مکران ڈویژن نا بجلی ءِ بحال کننگ آ منت واری ءِ ہرفے و پارے کہ بجلی نا بند مننگ آن علاقہ نا الس ءِ مشکل مون تروک ئس و بحالی آن الس ءِ ریلیف ملانے۔ سینیٹر کہدہ بابر ہم دا چرجوئی ٹی چیئرمین سینیٹ و ایران نا سفیر نا کمکاری نا منت واری ءِ ہرفے۔ اوپارے کہ چیئرمین سینیٹ نا ذاتی کوشست آتیان ویل ءِ ایسر کننگ اٹ کمک رسینگا۔ چیئرمین سینیٹ نا گمانی دورہ ایران نا بابت سفیر چیئرمین سینیٹ ءِ دورہ نا پلو آتا بارواٹ معلومدار کرے۔ چیئرمین سینیٹ پارے کہ ایران سنگت ملک ءِ و دورہ ایران ہڑتوم آ کنڈآتا کمکاری ءِ پین مون آ دننگ اٹ کمکارمریک۔
