اسلام آباد۔ 30جولائی (اے پی پی) بنجائی وزیر امور کشمیر وگلگت بلتستان علی امین خان گنڈاپور پارینے کہ آزاد کشمیر نا گچین کاری تیٹی عمران خان نا وژن ءِ پبی پذیرائی دوئی مسنے، ایل او سی نا ہڑتوم آ کنڈرہینگوک آ کشمیریک عمران خان ءِ تینا سفیر و حقی راہشون منانو، ایل اے 16ٹی سرسہبی آن تحریک انصاف آزاد کشمیر اٹی پین سوگو مسنے۔ جمعہ نا دے آ تینا جاری بیان نا رداٹ اوپارے کہ اپوزیشن آزاد کشمیر و سیالکوٹ اٹ تینا بے سہبی ءِ ڈکھنگ کن دھاندلی نا غوغاکننگ ءِ، 2023ء نا گچین کاری تیٹی تحریک انصاف سندھ اتون اوار مچ آ پاکستان اٹ سرسہب مریک، اپوزیشن تحریک انصاف نا مقبولیت ءِ ہرسا داسی آن ہوغنگ نا بناءِ کرینے۔ علی امین گنڈاپور پارے کہ تحریک انصاف آزاد کشمیر اٹ الس نا کنڈآن تروک آ مینڈیٹ نا پبی شرف ءِ کیک، عمران خان نا وژن ءِ عملی دروشم اس تننگ کن دے و نن ءِ اسٹ کینہ۔ علی امین گنڈاپور پارے کہ آزاد کشمیرنا محرومی تے چٹفنگ کن میگا پیکج اس ایتنہ، آزاد کشمیر اٹی حقی بدلی نا بنداو ءِ تخنگک۔
