اسلام آباد۔ 30جولائی (اے پی پی) صدر مملکت ڈاکٹر عارف علوی پارینے کہ بنجائی خراج محتسب و ایف بی آر تینا کارکڑد اٹ پین گچینی اتسا کاروبار اٹ آسانی تا بابت ویل آتے بھلو حداسسکان چٹفنگ کیک، خراج نا نظام اٹ شفافیت اتنگ آن محصول یکجا کننگ اٹ نمان ودکی مریک، خراج یکجا کننگ المی ءِ ولے داڑکن خراج نا نظام ءِ سادہ، آسان و شفاف کروئی مریک، ریاستی واکداری تیٹی بریبری و احتساب وجوابدہی نا نظام آن جمہوریت سوگو مریک۔ داخیال آتا درشانی ءِ او جمعہ نادے آ داڑے ایوان صدر اٹ بنجائی خراج محتسب نا کنڈآن اڈ ہلوک آ السی آگہی سیمینار آن مہمان خاص نا وڑاٹ تینا کلیدی تران اٹ کرے۔ داوخت آ چیئرمین ایف بی آر عاصم احمد، بنجائی خراج محتسب مشتاق احمد سکھیرا، چندی چیمبرز آف کامرس اینڈ انڈسٹریز و خراج بارایسوسی ایشن تا عہدیدار ونمائندہ غاک ہم ساڑی ئسر۔ صدر مملکت پارے کہ انسانی تاریخ اٹ حکمران تا احتساب نا روایت ریاست مدینہ غان بناکرے ہرا خلفائے راشدین نا دوراٹ ترندمس، احتساب و جوابدہی نا دانظام نا پیروی اوکان پد بروک آ مسلمان حکمرانک ہم کریر۔ صدر مملکت پارے کہ ریاستی واکداری ٹی بریبری و احتساب و جوابدہی نا نظام آن جمہوریت سوگو مریک، وڈی خورینا چٹفنگ ننا بایدے اولیت مرے انتئے کہ وڈی خوری آن راج انا زرگزرانی وڑاٹ نزور و نیزگار تپہ غٹ آن زیات زہمی مریک۔ صدر مملکت پارے کہ پاکستان اٹی جی ڈی پی و آبادی نا کچ اٹ خراج تروک آتا کچ دنیانا ایلو ملک آتا مقابلہ ٹی کم ءِ داناہراڑے ایلو سوب آک ءُ ہموڑے خراج نا نظام اٹ مروک آ ویل و یچڑ و خامیک ہم اہم سوب آک ءُ۔ داہیت ستاکڑزک کہ ساڑی حکومت نا پارت و راہشونی ٹی ایف بی آر داخامی و پیچیدگی تا چٹفنگ کن گام گیج آتا چرجوئی نا بناءِ کرینے۔ صدر مملکت پارے کہ ٹیکنالوجی نا سہی و گچین کاریم اٹ اتنگ آن خراج نا نظام اٹ مروک آ پیچیدگی و خامیتے کم کننگ اٹ کمک ملنگ کیک، چین اٹی داوخت آ ٹیکنالوجی و مصنوعی ذہانت نا کاریم اٹ اتنگ آن وام اکن درخواست تروک آتے پنچ منٹ انا تہہ ٹی تعلقدار ادارہ غاتیان فیڈ بیک ملنگ ءِ۔
