اسلام آباد۔ 30جولائی (اے پی پی) وزیراعظم عمران خان زرگزران نا سوگوی کن صنعتی شونداری نا اہمیت آ زور شاغسا پارینے کہ حکومت برآمد آتے ودفنگ کن صنعت آتے آسراتی فراوان کننگ ءِ ہراڑآن نئے بیرہی واپاری نسخان کم مریک و زرمبادلہ نا کوڑی تیٹی ودکی مریک، بلکن ملک اٹ روزگار نا وارخواہی ودی مریک، خراج نا نظام نا گچینی کن اصلاحات برجاءِ، غٹ اسٹیک ہولڈر آتون سلابت اٹ داعمل اٹ ترندی و گچینی بریک وخت اس کہ ملک انا غٹ بھلا صنعت و واپار نا ایوانک حکومت نا کاروبار دوست پالیسی و کاروبار اٹ آسانی کن کروک آ گام گیج آتیا پورو پت انا درشانی ءِ کرینو وکاروباری برادری نا سلابت اٹ خراج ریونیو ءِ ودفنگ نا حکمت عملی آ امنا کننگانے۔ وزیراعظم عمران خان تون ملک انا بھلا چیمبرآف کامرس نا صدر آک جمعہ نادے آ داڑے اوڑدہی کریر۔ اوڑدہی ٹی بنجائی وزیر توانائی حماد اظہر، بنجائی وزیر صنعت و پیدوارمخدوم خسروبختیار، وزیراعظم نا سلاہکار کامرس و زرکاری عبدالرزاق داؤد، وزیراعظم نا خصوصی کمکار ڈاکٹر شہباز گل، گورنر اسٹیٹ بینک ڈاکٹر رضاباقر آن بیدس تعلقدار کمامدارآک ہم ساڑی ئسر وخت اس کہ وزیر خزانہ شوکت فیاض ترین ویڈیو لنک انا کمک اٹ بشخ ہلک۔ اوڑدہی وزارت واپار نا کنڈآن بناکروک آ حکومت و کاروباری برادری نا نیام اٹ سلاہ تا ہل و تس و حکومتی پالیسی تیا آگاہی ءِ ودفنگ نا چرجوئی نا کڑی اسے۔ اوڑدہی ٹی بنجاہائے ایوان صنعت وواپار نا صدر تون اوار اوار کراچی، لاہور، سرحد، کوئٹہ، گوجرانوالہ، سیالکوٹ، فیصل آباد، گجرات، ملتان، سرگودھا، گوادر، اسلام آباد و راولپنڈی نا چیمبرآتا صدر آک و نائب صدر آک ساڑی ئسر۔ دیوان اٹی بشخ ہلوک آک وزیراعظم و اونا زرگزرانی ٹیم ءِ کورونا نا دین آن پد ہم ملک اٹ سرسہب زرگزرانی پالیسی تا سوب آن کم وود 4درسد جی ڈی پی گروتھ، بھلا صنعت آتا شرح نموتیٹی 15درسد اسکان نا ودکی، برآمدی صنعت کن آسراتی و اڑاند آتا توننگ، اسٹیٹ بینک انا نیام اٹ و چنکا صنعت آتے کن آسراتی(ہراٹی مشینری کن وام اوار ءِ) و کاروباری برادری ءِ ازبکستان نا واپاری کچ آن فائدہ ہرفنگ کن اوفتے اوار ہلنگ آ خراج تحسین پیش کریر۔ داکان بیدس خراج ریونیو و برآمدات و پیشن نا ملک آن ترسیلات زر اٹی ودکی آ وزیراعظم ءِ مبارکبادی تسر۔ بشخ ہلوک آک حکومت ءِ اولیکو وار کاروباری برادری نا ویل آتا ایسری کن اوفتا سلاہ تے براہ راست بننگ نا داگام گیج نا ہم ستاءِ کریر و مستین اٹ داوڑنا گام گیج آتا ساڑی مفننگ نا سوب آن حکومت وکاروباری برادری نا نیام اٹ ساڑی خلیج تون ملک اٹ کاروبارنا کسر اٹ بروک آ اڑاند آتا ہم ذکر ءِ کریر۔ بشخ ہلوک آک دیوان اٹی داہیت انا ہم درشانی ءِ کریر کہ کاروباری برادری خراج تننگ کن تیار ءِ و خراج نظام اٹ اصلاحات کن حکومت تون اواری اٹ کاریم کیک۔ وزیراعظم ملکی زرگزران نا سوگوی کن صنعتی شونداری نا اہمیت آ زور شاغسا پارے کہ حکومت برآمد آتے ودفنگ کن صنعت آتے آسراتی فراوان کننگ ءِ و ہراڑآن نئے بیرہ واپاری نسخان کم مریک و زرمبادلہ نا کوڑی تیٹی ودکی مریک، بلکن ملک اٹ روزگار نا وارخواہی ودی مریک۔ اومستی پارے کہ خراج نا نظام نا گچینی کن اصلاحات برجاءِ، غٹ اسٹیک ہولڈر آتون سلابت اٹ داعمل اٹ ترندی و گچینی بریک۔ وزیراعظم بنجائی وزیرآتے اسٹیک ہولڈر آتون پدریسہ رابطہ ٹی مننگ و اوفتا سلاہ و ویل آتے بننگ کن باقاعدگی اٹ اوڑدہی تا پارت جاری کرے۔ وزیراعظم مستیپارے کہ سیل وسوات نا صنعت نا شونداری کن لائحہ عمل، کشت وکشار نا شونداری کن جامع ایگریکلچرل پلان و صنعت آتے آسراتی و آسودہی فراوان کننگ انگ ءِ۔ ساڑی حکومت صنعت کار و کاروباری برادری ءِ آسراتی فراوان کننگ آن پد تینا چکار ءِ داسہ سلابت اٹ ویل آتا ایسری کن کوشست آتیا کننگ اٹی ءِ۔
