اسلام آباد۔29جولائی (اے پی پی): وزیر برائے چاگردی گہبود ءُ لس وانگ ءُ زانگ میر اسد اللہ بلوچ ءَ گوشتگ کہ کورونا وائرس ءِ نوکیں فیز ءَ مکران ڈویژن ءَ را سک باز آماچ کتگ ءُ نادُراھ آنی کساس ءِ تہ ءَ سک باز گیشی بوتگ، تجارتی چست ءُ ایر مھتلی ءِ آماچ انت، گوادر ، تربت ءُ پنجگور ءَ باز کم مردم سرکاری نوکری ءَ اَنت وھدیکہ گیشتریں آباتی ءِ بار یک شل ءَ یا دگہ نیمونے ءَ چہ سیم سر ءَ آدیم گوں تجارت ءَ دست مانجن اَنت۔ اے پی پی ءَ گوں تران کنان ءَ آئی ءَ بنجاھی حکومت ءَ گوں دست بندی کت کہ دمگ ءِ الس ءِ ھرابیں اقتصادی جاور ھال آنی رد ءَ کمکی پیکیج ءِ جار جنگ بہ بیت ءُ صوبائی حکومت ءَ را کویڈ 19 ءَ چہ پیداک بوھوکیں ھرابیں جاور ھال آنی گوما مقابلہ کنگ ءِ لائک جوڑ کنگ بہ بیت۔ آئی ءَ بنجاھی حکومت ءَ را زور پر دات کہ کورونا ءِ گر ءُ دار ءِ واستہ جتا جتائیں سینٹر جوڑ کنگ بہ بیت چیا کہ اسپتال آنی تہ ءَ رش گیش بوھگ ءَ انت۔ جان سلامتی ءِ آسراتی آناں گیش کنگ ءِ واستہ حکومت ءَ را استیں سرکاری نادُراھ جاہ، لیبارٹری آناں جدیدیں ٹیکنالوجی ءِ پجاری کنگ بہ بیت، ایمرجنسی بنیات آنی رد ءَ ویکسینیشن ءِ تہ ءَ ترندی آرگ بہ بیت۔ آئی ءَ گوشت کہ صوبائی حکومت پنجگور ضلع ءَ سرجمیں رنگ ءَ لاک ڈائون جنگ ءِ ھاترا چار ءُ بچار کنگ ءَ انت۔ پنت ءُ شون آنی رد ءَ لستیں دُکان آناں ھمروچگیں المیگیں چیز بھا کنگ ءِ موہ ءَ ابید توامیں دُکان ، ہوٹل ءُ ریستوران آناں آیوکیں دو ہفتگ آں تاں سرجمیں رنگ ءَ بند کنگ بنت۔ ماھیگ ءِ ہڈا ھم بند کنگ بنت وھدیکہ ایوک ءَ ویکسین کتگیں ماھیگ والا آناں موہ دیگ بیت۔ آئی ءَ بنجاھی حکومت ءَ گوں لوٹ کت کہ اے وڑیں نہ گیگیں جاور آنی تہ ءَ مکران ءِ بزگریں الس آناں کمکی پیکیج دیگ بہ بیت۔
