اسلام آباد۔ 29جولائی (اے پی پی) بنجائی وزیر توانائی حماد اظہر پارینے کہ حکومت بجلی اٹ چلینگوک آ گاڈی تا نہاد آتے ٹی کمتی اتنگ و ملک اٹ تیاری آ خاص چکار تخانے، اینخو نا سال ملک اٹی الیکٹرک گاڈی تا تیاری بناکیک، ریگولیشن، آب ءِ گچین کننگ و چارجنگ اسٹیشن آتا بابت باندات آتے مشکل بایدے جوڑ کننگپ، ون ونڈو و آن لائن آپریشن نا کمک اٹ اسہ ہفتہ نا تہہ ٹی منظوری نا عمل ءِ پورو کننگ آ چکار کننگے، الیکٹرک گاڈی تا کاریم اٹ اتنگ نا ودنگ آن پٹرول و ڈیزل نا درآمد آ خڑچ مروک آ ارب آ ڈالر نا زرمبادلہ نا بچت مریک۔ داخیال آتا درشانی ءِ او پنچ شنبے نادے آ نیشنل انرجی ایفیشنسی کنزرویشن اتھارٹی (نیکا) نا سلابتی ورکشاپ آن تران کرسا کرے۔ اوپارے کہ حکومت بجلی اٹ چلینگوک آ گاڈی تا نہاد آتے ٹی کمتی و ملک اٹ تیاری آ خاص چکار کرینے۔ الیکٹرک وہیکل پالیسی نا بھاز جوان ءُ اثراس مون آ بسنے۔ داپالیسی نا بننگ آن پد گاڈی تا درآمدی نہاداٹی کمتی مسنے و ہندی وڑاٹ بجلی اٹ چلینگوک آ گاڈی تا تیاری نا کنڈآ رجحان ودانے۔ اومیت ءِ کہ اینخو نا سال پاکستان اٹ الیکٹرک گاڈی تا تیاری نا ہم زوت بناءِ کننگک۔ الیکٹرک موٹربائیک آتا تیاری مہالوآن بناکرینے و داسہ بروک آ ریسہ ٹی ملک اٹی ایلو ازباب آتا تیاری مریک۔ اوپارے کہ دااسہ پوسکن ءُ ٹیکنالوجی اسے و دانا انفراسٹرکچر آ چکار کننگ نا گرج ءِ و داٹی چارجنگ اسٹیشن و انفراسٹرکچر کلیدی حیثیت تخرہ و داچرجوئی ٹی نیشنل انرجی ایفیشنسی کنزرویشن اتھارٹی (نیکا) نا کڑد بھاز اہمیت تخک تانکہ رکھی امور، ٹیرف پین پین ءِ گچین کننگ مرے و داگاڈی تے ملک اٹ مون آ دننگ ہم مرے۔ اوپارے کہ داہیت ستاکڑزک کہ نجی بشخ الیکٹرک گاڈی تا چارجنگ نا انفراسٹرکچر ءِ جوڑ کننگ نا بناءِ کرینے۔ حکومت اونا پبی است بڈی ءِ کننگ ءِ۔ اوپارے کہ اقوام متحدہ نا شونداری فنڈ دامچ آ بشخ انا ریگولیشن کن ننتون کمک کننگ ءِ۔ نیکا ءِ مرے کہ او دا غٹ عمل ءِ زوت آن زوت پورو کے تانکہ ریگولیشن، آب ءِ گچین کننگ و چارجنگ اسٹیشن تا بابت اسہ گچین ءُ پالیسی اس وزارت توانائی ءِ فراوان کننگ مرے تانکہ او کابینہ ٹی پیش کننگ مرے ولے دا چرجوئی ٹی ریگولیشن و آب ءِ گچین کننگ نا عمل اٹ چارجنگ انفراسٹرکچر کن باندات آتے مشکل جوڑ کننگپ و مخلوق ءِ داڑکن سرکاری آفیسر و خیسن آ فیتہ نا اڑاند آتون مون تروئی تمپ۔ اوپارے کہ داڑکن ون ونڈو و آن لائن آپریشن اس بایدے مرے و اسہ ہفتہ نا تہہ ٹی منظوری نا عمل پورو مرے و جہانی آب انا رداٹ اسہ ساف و شفاف و گچین وڑوڈول اس اختیار کننگے۔ اوپارے کہ نن ارب آ ڈالر نا پٹرول و ڈیزل درآمد کینہ۔ الیکٹرک گاڈی تیان داٹی کمتی بریک۔
