وزیرخارجہ شاہ محمود قریشی نا بحرین نا وزیر داخلہ شیخ راشد بن عبداللہ الخلیفہ تون اوڑدہی

اسلام آباد۔ 29جولائی (اے پی پی) وزیرخارجہ مخدوم شاہ محمود قریشی پنچ شنبے نادے آ منامہ ٹی بحرین نا وزیر داخلہ شیخ راشد بن عبداللہ الخلیفہ تون اوڑدہی کرے۔ گپ وتران اٹی ہڑتوم آ کنڈآتا تعلقداری و سیکورٹی و دفاعی بشخ آتے ٹی ہڑتوم آ کنڈآتا تعلقداری تا مون آ دننگ تون اوار تین پہ تینی است خواہی نا باندات آ گپ وتران کننگا۔ وزیرخارجہ پارے کہ پاکستان و بحرین نا نیام اٹ اسہ وڑ مذہبی، دودوربیدگی و تاریخی قدر انا بنداو آ استوار، برادرانہ تعلقداری ءِ۔ وزیرخارجہ کورونا دین اٹی بحرین حکومت نا کنڈآن کروک آ گام گیج آتا ستاءِ کرے ہرافتا سوب بحرین اٹ رہینگوک آ پاکستانی کمیونٹی ءِ ہچ وڑنا تکلیف آتون مون تروئی تمیتو۔ وزیرخارجہ کورونا نا دین انا مشکل ساہت اٹ وزارت داخلہ بحرین نا کنڈآن ویزہ ایمنسٹی اسکیم، جرمانہ غاتے ٹی چھوٹ، دوبہ دار آتا حوالگی و وطن آ پدی ہِننگ نا چاری پاکستانی تا آسراتی کن کروک آ گام گیج آتا ستاءِ کننگا۔ بحرینی وزیرداخلہ بحرین نا شونداری و شونہالی ٹی داڑے رہینگوک آ پاکستانی کمیونٹی نا مثبت کڑد انا ستا ءِ کرے۔ وزیرخارجہ پاکستان و بحرین نا نیام اٹ سوگو دفاعی و سیکورٹی تعلقداری تا حوالہ ءِ ترسا اوفتے اقتصادی و واپاری کمکاری نا مون آ دننگ کن کمکاری نا سوب گوندا۔ بحرینی وزیرداخلہ وزیر خارجہ مخدوم شاہ محمود قریشی نا منت واری ءِ ہرفساپاکستان و بحرین نا نیام اٹ تین پہ تینی است خواہی نا بشخ آتے ٹی کمکاری ءِ ودفنگ کن اسیجائی کوشست آتے کاریم اٹ اتنگ نا عندیہ تس۔