جنگ ہچ ءُ ویل اسے نا ایسر اف، امن ءِ موقع اس تروئی مریک، پاکستان خواہک کہ اوغانستان اٹی غٹ اسٹیک ہولڈرآتا نمائندہ حکومت مرے، وزیر مملکت حوالکاری و شینکاری فرخ حبیب نا پاک اوغان میڈیا کانکلیو آن تران

اسلام آباد۔ 29جولائی (اے پی پی) وزیر مملکت حوالکاری و شینکاری فرخ حبیب پارینے کہ داسہ جنگ ہچ ءُ ویل اسے نا ایسر اف، امن ءِ موقع اس تروئی مریک، پاکستان خواہک کہ امریکی فوج انا پیش تمنگ آن پد اوغانستان اٹی غٹ اسٹیک ہولڈر آتا نمائندہ حکومت مرے، پرامن اوغانستان، پاکستان نا فائدہ ٹی ءِ، اوغانستان نا الس خاص وڑاٹ ورناتے شونداری نا اسہ وڑ وارخواہی بایدے ملے، اینوہم 30لکھ اوغان باہوٹ ءِ پاکستان نا بشخ جوڑکرینو، مسکوہی فاٹا و ایلو علاقہ غاتا الس و اوغانی تا نیام اٹ ہزار آ سال متکن آ تعلقداری ءِ، داتاریخی ءِ ہچ ءُ حالیت اسے ٹی گوجالنگ مفک۔ اوپنچ شنبے نادے آ پی این سی اے ٹی ”پاک اوغان میڈیا کانکلیو“آن تران کریکہ۔ وزیر مملکت فرخ حبیب پارے کہ اوغانستان پاکستان نا ایلم ہمسایہ ملک ءِ، داپک ءُ حقیقت اسے ہرادے بدل کننگ مفک، پاکستان و اوغانستان ءِ اوار رہینگوئی ءِ۔ اوپارے کہ پاکستان نا کوشست ءِ کہ اوغانستان اٹی امن مرے، امریکی فوج انا پیش تمنگ آن پد اسہ ہندن ءُ حکومت اس مرے ہرا اوغانستان نا غٹ اسٹیک ہولڈر آتا نمائندہ حکومت مرے۔ اوپارے کہ کیہی دہائی آن اوغانستان اٹی جنگ انا حالیت ئس، داحالیت آتے ٹی اوغانستان نا مخلوق شونداری ٹی پدی سلیسر، داسہ اوغان الس خاص وڑاٹ ورناتے شونداری نا بریبروارخواہی فراوان کننگ وخت انا اہم انگا گرج ءِ۔ اوپارے کہ پاکستان ہمو ملک ءِ ہرااینو ہم 30لکھ اوغان باہوٹ آتے پاکستان نا بشخ جوڑ کرینے، اوغانیک داڑے کاروبار کننگ ءُ، چناتا اسہ ایلو تون برام مسنے، اوپارے کہ پاکستان نا ساڑی حکومت و عمران خان اوغانستان اٹی اوغان الس نا مرضی والا حکومت نا مخ تفی ءِ کیک۔ اوپارے کہ نن خوانہ کہ اوغانستان نا میڈیا نا کاریم نا کچ اٹ ودکی کن ہیلکاری نشست اڈتننگے۔ دارداٹ وزارت حوالکاری و شینکاری ناخذمت آک حاضرءُ۔ اوپارے کہ اسہ ایلو تون اوڑدہی تیان کمیونیکیشن گیپ چٹک و اسہ ایلو ءُ پہہ مننگ اٹ کمک رسینگک۔ اوپارے کہ فیصل آباد اٹی بھلو کچ اسے آ اوغانیک بریرہ و چندی وڑنا مصنوعات ہلسا تینا ملک آ دیرہ، اوغانیک دارودرمان کن پاکستان آ بریرہ، پاکستان تینا است ءِ بھلن کرینے۔ اوپارے کہ اوغان ویل انا ہچ ءُ فوجی ایسر اس اف، پاکستان نا کوشست ئس کہ مذاکرات نا کمک اٹ غٹ اسٹیک ہولڈر آک امنائی سلاہ غا سرمریر، نیامی ایشیائی ریاست آتے اسہ ایلوتون گنڈنگ کن اوغانستان نا اہم ءُ کڑد اسے، پاکستان دارداٹ مثبت کوشست آتے برجاتخانے۔ اوپارے کہ اوغان میڈیاپرامن اوغانستان نا بابت پاکستان نا عزم ءِ تالان کے انتئے کہ پاکستان ہمو ملک ءِ ہراوغان جنگ آن زہمی مس، ننے 150ارب ڈالر نا زرگزرانی نسخان ہرفوئی تما، 70ہزار جان زیان مس، اوغانستان اٹی لگوک آ خاخر نا تیرونک آک پاکستان آ ہم برساکرینو۔ اوپارے کہ داسہ جنگ ہچ ءُ ویل اسے نا ایسر اف، داسہ ننے امن ءِ موقع تروئی ءِ، اومیت ءِ کہ پاکستان و اوغانستان میڈیا نا مثبت واہم کڑد ساڑی سلک۔