چیئرمین سینیٹ تون قائم مقام اسپیکر قومی اسمبلی محمد قاسم خان و گورنر بلوچستان سید ظہور آغا نا اوڑدہی

اسلام آباد۔ 29جولائی (اے پی پی) چیئرمین سینیٹ محمد صادق سنجرانی تون قائم مقام اسپیکر قومی اسمبلی محمد قاسم خان سوری و گورنر بلوچستان سید ظہور احمد آغا پارلیمنٹ ہاؤس اٹی اوڑدہی کریر۔ سینیٹ سیکرٹریٹ نا رداٹ اوڑدہی ٹی صوبہ بلوچستان نا بابت چندی باندات آ گپ وتران کننگا۔ اوڑدہی ٹی السی راجی و آسراتی آ چکار تخنگ و صوبہ نا مثبت دروشم ءِ تالان کننگ کن عملی گام گیج کننگ آ امنا کننگا۔ ملکی سیاسی حالیت، بلوچستان اٹی برجا شونداری ڈٹ آتیا ہم شرہ مس۔ داوخت آ چیئرمین سینیٹ صادق سنجرانی پارے کہ سی پیک ڈٹ و گوادر بندرگاہ غان صوبہ نا قسمت بدل مریک، شونداری ڈٹ آتیان بلوچستان نا ورناتے روزگار دُوبریک۔ گورنر بلوچستان چیئرمین سینیٹ ءِ صوبہ ٹی کورونا دین انا حالیت آتیان ہم معلومدار کرے۔ چیئرمین سینیٹ پارے کہ بلوچستان اٹی کورونا نا حالیت آک سنگین مننگ ءُ۔ چیئرمین سینیٹ کورونا نا دین انا توننگ کن گچین گام گیج کننگ و دین انا برخلاف الس کن آگاہی مہم اس چلیفنگ آ زور شاغا۔ اوپارے کہ کورونا دین اتون مون تننگ کن ایس او پی تیا عملدرآمد ءِ پک کروئی مریک۔