گورنر بلوچستان نا قائم مقام اسپیکر قومی اسمبلی تون اوڑدہی، بلوچستان نا شونداری و شونہالی ملکی شونداری و شونہالی کن المی ءِ، قائم مقام اسپیکر قومی اسمبلی

اسلام آباد۔ 29جولائی (اے پی پی) قائم مقام اسپیکر قومی اسمبلی قاسم خان سوری تون گورنر بلوچستان سیدظہور احمد آغا چارشنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی ملک انا جم سیاسی و زرگزرانی حالیت، بلوچستان اٹی برجا شونداری ڈٹ و تین پہ تینی است خواہی نا ایلو باندات آ گپ وتران کننگا۔ قائم مقام اسپیکر قاسم خان سوری پارے کہ ملک ءِ مون تروک چیلنج آتون مون تننگ کن ملک انا غٹ اکائی تا نیام اٹ ہم آہنگی ٹی ودکی و اواری اٹ کاریم کننگ نا گرج ءِ۔ اوپارے کہ بلوچستان نا شونداری و شونہالی ملکی شونداری و شونہالی کن المی ءِ و صوبہ نا شونداری و شونہالی و السی راجی آسراتی کن صوبائی حکومت نا کنڈآن چست کروک آ گام گیج ستاکڑزک۔ اوپارے کہ وزیراعظم عمران خان صوبہ بلوچستان نا شونداری و شونہالی ٹی بھاز است خواہی تخک و اونا کماشی ٹی ساڑی حکومت صوبہ بلوچستان آن پسماندگی نا چٹفنگ و صوبہ غاتے ایلو صوبہ غاتا بریبر اتنگ کن کوشست کننگ ءِ۔ اوسید ظہور احمد آغا ءِ گورنر بلوچستان نا عہدہ ءِ سنبھالنگ آ مبارکبادی ترسا داپت انا درشانی ءِ کرے کہ اونا کماشی ٹی صوبہ بلوچستان شونداری نا کنڈآ کاہک و الس ءِ مون تروک ویل ایسر مریک۔ اوکوئٹہ شار انا زیبائی ٹی ودکی و شاری تے مون تروک ویل آتا ایسری کن گورنر نا خاص است خواہی نا ستاءِ کرے۔ قائم مقام اسپیکر گورنر ءِ ایوان اٹ السی راجی آسراتی کن کروک آ کانودسازی نا سرجم آتیان ہم معلومدار کرے۔ داوخت آ گپ وتران کرسا گورنر بلوچستان پارے کہ بلوچستان نا شونداری و شونہالی و اودے ملک انا ایلو صوبہ غاتا بریبر اتنگ ساڑی حکومت نا اولیت ءِ۔ اوپارے کہ ساڑی آ بجٹ اٹ الس نا راجی آسراتی و اوفتے بنداوی آسراتی تا فراوانی کن بھلو فنڈاس جتا کننگانے۔ صوبہ ٹی برجا شونداری ڈٹ آتا ذکر ءِ کرسا اوپارے کہ صوبہ ٹی بنجانا کمک اٹ میگا شونداری ڈٹ آتا بناءِ کننگانے ہرافتیا کاریم ترندی اٹ برجاءِ، داڈٹ آتا پوروی آن صوبہ غان پسماندگی چٹک ولس بندغ نا زند انا آب بڑزمریک۔ اوپارے کہ صوبہ ٹی امن و ایمنی و الس ءِ مون تروک ویل آتا ایسری کن صوبائی حکومت نا کنڈآن خصوصی گام گیج کننگ انگ ءِ۔ گورنر پارے کہ کوئٹہ صوبہ نا دارالحکومت ءِ و داشار انا زیبائی ٹی ودکی و شاری تے مون تروک ویل آتے ایسر کننگ کن تعلقدار کمامدارآتے خاص پارت جاری کننگانے۔ گورنر ایوان نا کارروائی ءِ جوانی اٹ چلیفنگ آ قائم مقام اسپیکر نا بے کنڈہلوک کڑد و ایوان اٹ السی راجی آسراتی کن کروک آ کانودسازی نا ستاءِ کرے۔ اوکان پد قائم مقام اسپیکر بشامی آ شجرکاری مہم نا چرجوئی ٹی پارلیمنٹ ہاؤس سوزہ زار اٹی گورنر بلوچستان تون اوار مگولیا گریندی فلورانیال اس خلک و ملک انا شونداری و شونہالی کن خصوصی دعا کریر۔ داوخت آ قومی اسمبلی سیکرٹریٹ نا قائم مقام سیکرٹری چوہدری مبارک علی و ایلو بڑزکو آفیسر آک ہم ساڑی ئسر۔