بحرین تون اقتصادی و واپاری رابطہ غاتے ودفنگ نا خواہندار اُن، وزیر خارجہ

اسلام آباد۔ 29جولائی (اے پی پی) وزیرخارجہ مخدوم شاہ محمود قریشی پنچ شنبے نادے آ منامہ ٹی بحرین نا ولی عہد، نائب سپریم کمانڈر و وزیراعظم شہزادہ سلمان بن حمد بن عیسیٰ الخلیفہ تون اوڑدہی کرے۔ دفترخارجہ نا رداٹ گپ وتران اٹی ہڑتوم آ کنڈآتا تعلقداری و علاقائی حالیت آتون اوار تین پہ تینی است خواہی نا امور آ گپ وتران کننگا۔ وزیرخارجہ ولی عہد شہزادہ سلمان بن حمد الخلیفہ ءِ بحرین نا وزارت عظمیٰ نا منصب ءِ سنبھالنگ آ وزیراعظم عمران خان نا کنڈآن مبارکبادی تس و نیک است خواہی نا درشانی ءِ کرے۔ وزیرخارجہ پارے کہ 2019ء ٹی وزیراعظم عمران خان نا دورہ بحرین آن ہڑتوم آ ملک آتا نیام اٹ ہڑتوم آ کنڈآتا برادرانہ تعلقداری ءِ پین وسعت ملا، پاکستان، وزیراعظم عمران خان نا وژن ءِ مون آ تخسا اقتصادی شونداری نا ایجنڈاگا عمل کننگ ءِ۔ شاہ محمود قریشی پارے کہ سلطنت بحرین تون اقتصادی و واپاری رابطہ غاتے ودفنگ نا خواہندار اُن۔ اوڑدہی ٹی بحرین اٹی رہینگوک آ پاکستانی کمیونٹی نا راجی آسراتی تون تعلقدار امور آ ہم شرہ مس۔ ولی عہد شہزادہ سلمان بن حمد بن عیسیٰ الخلیفہ بحرین نا شونداری و شونہالی ءِ، داڑے رہینگوک آ پاکستانی کمیونٹی نا تعمیری کڑد انا ستاءِ کرے۔ اوبحرین نا دفاعی و سیکورٹی کچ انا شونداری ٹی پاکستان نا کمکاری نا ستاءِ کرے۔ وزیرخارجہ بحرین نا وزیراعظم ولی عہد شہزادہ سلمان بن حمد بن عیسیٰ الخلیفہ ءِ وزیراعظم عمران خان نا کنڈآن دورہ پاکستان نا سلہ خلک۔ وزیراعظم بحرین وزیراعظم عمران خان نا سلہ نا منت واری ءِ ہرفسا پاکستانی سرکڑدہ و الس نا شونداری و شونہالی کن نیک است خواہی نا درشانی ءِ کرے وخت اس کہ بحرین نا وزیراعظم، ولی عہد شہزادہ سلمان بن حمد الخلیفہ وزیراعظم عمران خان و پاکستانی الس کن نیک است خواہی نا درشانی ءِ کرے۔