گورنر بلوچستان سید ظہور احمد آغاتون بنجائی وزیر حوالکاری چوہدری فواد حسین نا اوڑدہی

بلوچستان اٹی راجی و اقتصادی شونداری حکومت نا اولیت ءِ، وزیراعظم نا بلوچستان پیکج آن صوبہ نا ہفتاد سال انا محرومیک چٹرہ، چوہدری فواد حسین

اسلام آباد۔ 29جولائی (اے پی پی) گورنر بلوچستان سید ظہور احمد آغا تون بنجائی وزیر حوالکاری و شینکاری چوہدری فواد حسین پنچ شنبے نادے آ داڑے اوڑدہی کرے۔ بنجائی وزیر حوالکاری ظہور احمد آغا ءِ گورنر بلوچستان نا عہدہ ءِ سنبھالنگ آ مبارکبادی تس۔ داوخت آ گپ وتران کرسا چوہدری فواد حسین پارے کہ بلوچستان اٹی راجی و اقتصادی شونداری حکومت نا اولیت ءِ، بدبختی اٹ مستین اٹ اسٹ اس ہم بلوچستان نا شونداری آ چکار کتو، پی ٹی آئی نا حکومت بلوچستان ءِ غٹ آن بھلا شونداری پیکج اس تس۔ اوپارے کہ وزیراعظم عمران خان نا کنڈآن پڑوکروک بلوچستان پیکج آن ڈیہہ نا ہفتاد سال انا محرومیک چٹرہ۔ اوپارے کہ سی پیک نا غٹ آن زیات فائدہ بلوچستان ءِ مریک، بلوچستان اٹی شونداری ڈٹ آک حقی گیم چینجرمریرہ، داڈٹ آتے وخت آ پورو کننگک۔ بنجائی وزیر حوالکاری پارے کہ بلوچستان ءِ ملک انا ایلو صوبہ غاتا بریبر اتنگک۔ اوپارے کہ بلوچستان اٹی شونداری کن امن المی ءِ، اومیت ءِ کہ گورنر بلوچستان امن و ایمنی نا حالیت آتے گچین کننگ اٹ تینا اہم کڑد ءِ ادا کیک۔ داوخت آ گورنر بلوچستان پارے کہ بنجائی حکومت نا کنڈآن بلوچستان نا محرومی تے مرکننگ نا کوشست سفت نا قابل ءِ۔ اوپارے کہ او بنجا و صوبائی حکومت نا نیام اٹ گچین رابطہ غاتے کن تینا کڑد ءِ برجاتخک۔ ہڑتوم آ حکومت آتا نیام اٹ گچین رابطہ غاتا فائدہ بلوچستان نا الس ءِ مریک۔ داوخت آ ڈپٹی اسپیکر قومی اسمبلی قاسم خان سوری و سیکرٹری حوالکاری شاہیرہ شاہدئسک ہم ساڑی ئسر۔