صدر مملکت ڈاکٹر عارف علوی نا سویلی افریقہ نا چیف آف نیشنل ڈیفنس فورسز تون اوڑدہی ٹی گپ وتران

اسلام آباد۔ 29جولائی (اے پی پی) صدر مملکت ڈاکٹر عارف علوی پاکستان و سویلی افریقہ نا نیام اٹ دفاعی بشخ اٹ کمکاری ءِ پین مون آ دننگ نا گرج آ زور شاغسا پارینے کہ پاکستان سویلی افریقہ تون واپاری، زرکاری و دفاعی تعلقداری تے پین ودفنگ خواہک۔ داخیال آتا درشانی ءِ او سویلی افریقہ نا چیف آف نیشنل ڈیفنس فورسز جنرل رڈزینی مفوانا یا تون گپ وتران کرسا کرے ہرا پنچ شنبے نادے آ ایوان صدر اٹی اوڑتون اوڑدہی کرے۔ صدر مملکت پارے کہ پاکستان و سویلی افریقہ نا نیام اٹ دفاعی پڑاٹ گچین تعلقداری ءِ ہرادے پین ودفنگ نا گرج ءِ۔ اوپارے کہ ہڑتوم آ ملک آتا نیام اٹ چندی بشخ آتے ٹی تین پہ تینی کمکاری ءِ ودفنگ نا بھلو لائخی اس ارے، پاکستان تینا ”لک افریقہ“ پالیسی نا رداٹ سویلی افریقہ تون تعلقداری تے بھاز اہمیت ایتک۔ اوپارے کہ ہڑتوم آ کنڈآتا تعلقداری تے پین سوگو کننگ کن فوجی و سیاسی کہول آ ہن و برآتے ٹی ودکی نا گرج ءِ۔ صدر مملکت کورونا دین اتون مون تننگ کن پاکستان نا سمارٹ لاک ڈاؤن نا حکمت عملی و اونا سرسہبی نا بارواٹ معلومدار کرے۔ داوخت آ صدر مملکت بھارتی غیر کانودی مقبوضہ جموں وکشمیر اٹی بھارتی سیکورٹی فورس آتا کنڈآن انسانی حق انا لتاڑتے ہم مون آ تخا۔ اوپارے کہ بھارت بے گناہ کشمیری مسلمان تے شہید کرسا اوفتا نسل کشی و آبادیاتی بیٹ کچ ءِ بدل کننگ کن ہراکہ کشمیری افس اوفتے ڈومیسائل جاری کننگ کون آ گام گیج آتے کننگ ءِ، جہانی برادری بھارتی مقبوضہ کشمیر نا الس ءِ حق خودارادیت ترفنگ کن سلامتی کونسل نا قرارداد آتیا عملدرآمد کرفے۔ داوخت آ سویلی افریقہ نا چیف آف نیشنل ڈیفنس فورسز پارے کہ پاکستان و سویلی افریقہ نا سلہہ بند فوج انا نیام اٹ گچین تعلقداری ءِ تین پہ تینی فائدہ کن پین گچین کننگ نا گرج ءِ۔ صدر مملکت دااومیت نا درشانی ءِ کرے کہ سویلی افریقہ نا چیف آف نیشنل ڈیفنس فورسز نا دورہ غان ہڑتوم آ ملک آتا نیام اٹ تعلقداری تے پین سوگو کننگ اٹ کمک رسینگک۔