لس بندغ اسکان آسان و دمدستی انصاف نا فراوانی ءِ پک کننگ ساڑی حکومت نا اولیت ءِ، وزیراعظم عمران خان

اسلام آباد۔ 29جولائی (اے پی پی) وزیراعظم عمران خان پارینے کہ لس بندغ اسکان آسان و دمدستی انصاف نا فراوانی ءِ پک کننگ ساڑی حکومت نا اولیت ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او اٹارنی جنرل خالد جاوید خان تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی اٹارنی جنرل وزیراعظم ءِ چندی عدالتی امور، نظام انصاف نا بابت جاری اصلاحات و ”واٹر کمیشن رپورٹ“ آ حوال تس۔ وزیراعظم عمران خان واٹر کمیشن رپورٹ نا بابت جسٹس شاہد کریم نا کوشست آتا ستاءِ کرے۔ وزیراعظم پارے کہ دیر انا ویل بھاز اہم ءُ معاملہ اسے۔ دااہم قومی معاملہ ٹی جسٹس شاہد کریم نا خاص است خواہی و کوشست ستاکڑزک۔ وزیراعظم جسٹس (ر) علی اکبر قریشی نا کماشی ٹی واٹر کمیشن رپورٹ اس مرتب کروک آ ٹیم انا کوشست آتا ہم ستاءِ کرے۔ چندی عدالتی امور و جاری اصلاحات آ ہیت کرسا وزیراعظم پارے کہ لس بندغ اسکان آسان و دمدستی انصاف نا فراوانی ءِ پک کننگ ساڑی حکومت نا اولیت ءِ۔ وزیراعظم پارے کہ عدالتی و انصاف نا نظام نا کسر اٹ بروک آ اڑاند آتے مر کننگ و عدالتی نظام ءِ پین گچین کننگ نا بابت حکومت عدلیہ ءِ ہرممکن کمک و وسیلہ غاتا فراوانی کن سنبرینگوک ءِ۔