اسلام آباد۔ 28جولائی (اے پی پی) وزیراعظم عمران خان پارینے کہ سیل و سوات نا بشخ انا مون آ دننگ حکومت نا اولیت آتے ٹی اوار ءِ۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان تون وزیراعلیٰ خیبرپختونخوامحمود خان اوڑدہی کرے۔ وزیراعلیٰ خیبرپختونخوا وزیراعظم ءِ چندی ضلع غاتے ٹی برجاسیل و سواتی سرجز و بروک آ ملکی و درملکی سیل و سواتی تے آسراتی فراوان کننگ و ویل آتا توننگ کن چست کروک آ حکومتی گام گیج آتیان سرجم وڑاٹ معلومدار کرے۔ صوبہ خیبرپختونخواٹی سیل و سواتی تے گچین آسراتی تننگ کن جامع حکمت عملی اس مرتب کننگانے داکان بیدس سیل و سوات نا مون آ دننگ کن تروک آ روڈ میپ انا رداٹ شونداری ڈٹ و گام گیج آتیا پیش رفت آن معلومدار کرے۔ اووزیراعظم ءِ اوار مروک ضلع غاتے ٹی برجا شونداری ڈٹ آتیا پیش رفت آہم حوال تس۔ وزیراعظم عمران کان سیل وسوات نا مون آ دننگ نا اہمیت آ زور شاغسا پارے کہ سیل و سوات نا بشخ انا مون آ دننگ حکومت نا اولیت آتے ٹی اوار ءِ۔ اوپارے کہ سیل و سوات نا مون آ دننگ آن نئے بیرہ ہندی علاقہ غاتے ٹی زرگزرانی سرگرمی ودی مریک بلکن ملکی زرگزران آہم مثبت اثرمرتب مریک۔
