اسلام آباد۔ 28جولائی (اے پی پی) وزیراعظم عمران خان پارینے کہ پاکستان دہشت گردی نا برخلاف جنگ اٹ غٹ آن زیات قربانی تسنے و داڑآن پاکستان نا زرگزران ءِ ناقابل تلافی نسخان رسینگانے، دہشت گردی نا برخلاف جنگ اٹ 70ہزار آن زیات پاکستانی جان نا قربانی تسنو و پاکستان نا زرگزران ءِ 150ارب ڈالر آن زیات نا نسخان مس۔ امریکہ و نیٹو فوج انا شکست نا دوبہ ءِ پاکستان آ خلنگ ناانصافی اسے، امریکہ اوغان ویل انا ایسر اس کشنگ اٹ بے سہب مسنے، اسہ ملک اس ہم مذاکرات کن طالبان تیا پاکستان آن زیات زور شاغتنے، پاکستان نا زرگزران پین اوغان باہوٹ آتا بھاریم ءِ ہرفنگ کپک، پاکستان اوغانستان اٹی امن کن کمکاری کننگ ءِ، پاکستان اوغانستان اٹی ہچ ءُ جھیڑہ سے ٹی بشخ ہلپک۔ نن بیرہ امن نا شریدار اُن، جنسی بیدادی کروک آ فرد دا ڈوہ انا اسٹ انگا زموارمریک و جنسی بیدادی نا شست مروک آ قصوروارمفک۔ امریکی نشریاتی ادارہ ”پی بی ایس“ ءِ انٹرویو ٹی وزیراعظم پارے کہ امریکہ و نیٹو فوج انا شکست نا دوبہ ءِ پاکستان آ خلنگ ناانصافی اسے، اوغانستان تدوک آ 40سال آن جنگ انا حالیت اٹی ءِ، پاکستان چندی وار اوغان باہوٹ آتا پدی ہِننگ نا ہیت ءِ کرینے، پاکستان و اوغانستان نا نیام اٹ 1500میل مرغن ءُ سیم اسے، داوخت اس ہم باقاعدہ سیم اس الوکہ، دادے ڈیورنڈ لائن پاننگاکہ۔ اوپارے کہ پاکستان و اوغانستان ہڑتوم آ کنڈآتا مخلوق آجوہنارہ بسرہ، پاکستان اولیکو وار بھلو زراس خڑچ کرسا باڑخلکونے، اسہ وخت اس ہندن ءُ ئس کہ 50جتا سلہہ بند پڑک پاکستان نا سیکورٹی فورس آتیا جلہوکریرہ۔ وزیراعظم عمران خان پارے کہ دہشت گردی نا برخلاف جنگ اٹ غٹ آن زیات نسخان پاکستان نا مس، دہشت گردی نا برخلاف جنگ اٹ 70ہزار آن زیات پاکستانی جان تا قربانی ءِ تسر، داجنگ آن پاکستان نا زرگزران ءِ 150ارب ڈالر آن زیات نا نسخان مسنے۔ اوپارے کہ امریکہ ءِ اڈہ تننگ آن پاکستان ولدا دہشت گردی نا شست مریک، پاکستان امن اٹ شریدار ءِ و او جھیڑہ غاتے ٹی بشخ ہلنگ کپک، پاکستان نا موقف اسل پیدوار ءِ، پاکستان اوغانستان اٹ امن کن کمکاری کننگ ءِ۔ وزیراعظم پارے کہ پاکستان امریکہ و طالبان تے مذاکرات نا میزآ اتنگ کن کڑد ادا کرینے، نن بھاز مشکل اٹ خراب زرگزرانی حالیت آن پیش تمانن، دعاکینہ کہ اوغانستان نا الس تینا آخبت نا فیصلہ ءِ تینٹ کیر، داسہ نیم آن زیات اوغانستان طالبان تا کنٹرول اٹی ءِ۔ وزیراعظم عمران خان پارینے کہ امریکہ اوغان ویل انا فوجی ایسر اس پٹسا کرے ہراممکن الوکہ چنانچہ امریکہ اوغان ویل انا ایسر اس کشنگ اٹ بے سہب مسنے، اوغانستان نا تاریخ آن بلداُٹ، مہالوہی پاریسن کہ اوغان ویل انا فوجی ایسر اف، کنے تینا دا بیان آ امریکہ مخالف و طالبان خان پاننگا۔ اوپارے کہ بدبختی اٹ امریکہ و نیٹو فوج مذاکرات نا لائخی ءِ گوہار، ہراتم اوغانستان اٹی یک و نیم لکھ فوج ئسر ہموتم آ سیاسی ایسر اسے نا کوشست کننگوسس، داسہ اوغانستان اٹی خانہ جنگی نا گڑتی ءِ، اوغانستان اٹی خانہ جنگی آن پاکستان ہم زہمی مریک، اوغانستان اٹی خانہ جنگی آن پاکستان ءِ دُوارہ ویل آتا مون تروک مریک، پاکستان 30لکھ آن زیات اوغان باہوٹ آتا مہمانداری ءِ کننگ ءِ، پاکستان اٹی ہم پشتون بھلو کچ اسے ٹی آباد ءُ، گڑتی ءِ کہ خانہ جنگی آن پین باہوٹ آک پاکستان ناکنڈآ بریرہ، پاکستان نا زرگزران پین باہوٹ آتا بھاریم ءِ ہرفنگ کپک۔ اوپارے کہ پاکستان نا حکومت دہشت گردی نا برخلاف جنگ اٹ امریکہ تون اوار مس تو مچ آ ملک اٹی خودکش جلہو مس، نائن الیون جلہو آتے ٹی ہچ ءُ پاکستانی اس اوار الوکہ، دہشت گردی نا برخلاف جنگ اٹ غٹ آن زیات نسخان پاکستان نا مس، خودکش جلہو آتیان واپار و سیل و سوات بھاز بے وڑ زہمی مسر۔ وزیراعظم عمران خان پارے کہ امریکہ اوغانستان آن پیش تمنگ نا تاریخ تس تو طالبانک سمجھار کہ اوکٹانے، داسہ طالبان تے سیاسی ایسر آ بیوس کننگ بھاز مشکل مسنے، طالبان اوغانستان اٹی تینے سرسہب تکرہ، دعاکینہ کہ اوغانستان نا الس تینا آخبت نا فیصلہ ءِ تینٹ کیر، داسہ نیم آن زیات اوغانستان طالبان نا کنٹرول اٹی ءِ، اسہ ملک اس ہم مذاکرات کن طالبان تیا پاکستان آن زیات زور شاغتنے، پاکستان نا موقف پیدوار ءِ، پاکستان اوغانستان اٹی امن کن کمکاری کننگ ءِ، پاکستان ہچ ءُ جھیڑہ سے ٹی بشخ ہلپک۔ اوپارے کہ اوغان صدر اشرف غنی گچین کاری تیٹی تاخیر کروسس۔ وزیراعظم عمران خان پارے کہ اسلام زالبول آتے عزت و شرف ایتک، زالبول آتا بابت کنا بیان ءِ چپ پیش کننگا۔ ای پاکستانی راج اٹی جنسی ڈوہ تیٹی ودکی آ ہیت کریٹہ۔ کنا مطلب راج اٹ برائی نا ترغیب ءِ کم کننگ ئس۔ اسلام اٹ پڑدہ بیرہ زالبول آتسکان محدود اف، نرینہ غاتے کن ہم پڑدہ نا لحاظ کننگ المی ءِ۔ اوپارے کہ جنسی بیدادی کروک آ بندغ ہی دا ڈوہ انا اسٹ انگا زموار مریک و جنسی بیدادی نا شست مروک آ قصور وار مفک۔
