اسلام آباد۔ 28جولائی (اے پی پی) وزیراعظم عمران خان بنجائی و صوبائی حکومت و اسٹیٹ لائف کارپوریشن ءِ جان جوڑی کارڈ پروگرام نا بابت خاص یونٹ ٹہیفنگ نا پارت کرینے ہرادا پروگرام آ عملدرآمد آ پدریسہ نظر شاغر و ہروڑنا مون تروک ویل ءِ دمدستی وڑاٹ ایسر کیر۔ وزارت حوالکاری نا کمک اٹ پروگرام ءِ جوان وڑاٹ تشہیر کننگے تانکہ زیات آن زیات الس ءِ داپروگرام و اونا فائدہ غاتیان آگاہی مرے تانکہ اوداڑآن فائدہ ہرفر۔ وزیراعظم عمران خان نا کماشی ٹی جان جوڑی نا بشخ اٹی حکومت نا تاریخی گام ”جان جوڑی آسراتی کارڈ“ انا کمک اٹ الس ءِ جان جوڑی نا آب اٹ آسراتی تا فراوانی نا بابت جاچ دیوان چارشنبے نادے آ اڈ ہلک، دیوان اٹی خصوصی کمکار جان جوڑی ڈاکٹر فیصل سلطان، خصوصی کمکار ڈاکٹر شہباز گل، وزیر جان جوڑی پنجاب ڈاکٹر یاسمین راشد، وزیر جان جوڑی خیبرپختونخواتیمور سلیم جھگڑا، بنجائی و صوبائی سیکرٹری صاحب آک ہیلتھ ڈیپارٹمنٹ و ایلو سینئر آفیسر آک بشخ ہلکر۔ دیوان اٹی صوبہ پنجاب و صوبہ خیبرپختونخواٹی جان جوڑی کارڈ انا فراوانی، فاہدہ ہرفوک آ بندغ آتا حساب وکتاب و داتم اسکان داپروگرام آ مروک آ خڑچ و اوٹی الس ءِ رسینگوک آ ریلیف آ سرجم حوال تننگا۔ دیوان ءِ پاننگاکہ صوبہ خیبرپختونخواٹی جان جوڑی آسراتی کارڈ پروگرام نا کمک اٹ چندی سرکاری و پرائیویٹ ہسپتال آتے ٹی اِرالکھ دہ ہزار دوسد ایڈمیشن تا کمک اٹ لکھ آ بندغ فائدہ ہرفینو۔ ہرافتیان داتم اسکان 5.3ارب روپئی خڑچ کننگانے۔ دیوان ءِ پاننگانے کہ جان جوڑی کارڈ انا کمک اٹ 26چندی ناجوڑی تا رداٹ الس ءِ آب اٹ آسراتی تا فراوانی ءِ پک کننگ انگ ءِ۔ اوفتے ٹی است اتون اوار ہمومرض آک اوار ءُ ہرافتا درمان قدرے کبینی و نیزگار خاہوت آتا مالی وسیلہ غاتیان پیشن مریک۔ دیوان ءِ پاننگاکہ صوبہ پنجاب اٹی داتم اسکان 85لکھ خاہوت ءِ جان جوڑی کارڈ انا آسراتی فراوان کننگانے۔ وزیراعظم جان جوڑی آسراتی کارڈ انا کمک اٹ الس ءِ دوبروک آ ریلیف آ است جمی نا درشانی ءِ کرسا پارے کہ جان جوڑی نا آب اٹ آسراتی تا فراوانی نا ساڑی آ پروگرام ملکی تاریخی نا غٹ آن بھلا و تاریخی پروگرام اسے۔ اوپارے کہ اولیکو وار ساڑی آ حکومت جان جوڑی نا بابت نزور تپہ غاتا احساس ءِ کرسا ہندن ءُ جامع پروگرام اس بناکرینے ہرانا سوب آن نئے بیرہ سرکاری بلکن پرائیویٹ ہسپتال آتیان ہم نزور تپہ ءِ جان جوڑی نا آب اٹ آسراتی دوبننگ ءِ۔ وزیراعظم پارے کہ جان جوڑی آسراتی کارڈ آن ہیلتھ سیکٹر اٹ اسہ پوسکن ءُ نظام اس جوڑ مننگ ءِ۔ ساڑی آ پروگرام آن پرائیویٹ سیکٹر نا ہسپتال آتے مون آ دننگ دوئی مریک و اوفتے خلقی و مرمرانگا علاقہ غاتے ٹی تینا خذمت آتا فراوانی ٹی کمک رسینگک۔
