اسلام آباد۔ 28جولائی (اے پی پی) وزیرخارجہ مخدوم شاہ محمود قریشی چارشنبے نادے آ بحرین نا اِرادے ئی دورہ غا روانہ مس۔ وزیرخارجہ بحرین اٹی اڈ ہلوک آ، پاکستان۔بحرین مشترکہ وزارتی کمیشن(جے۔ایم۔سی) نا ارٹ میکو دیوان اٹی پاکستانی ڈل انا کماشی و ’جے۔ایم۔سی‘ نا ارٹ میکو دیوان اٹی پاکستان نا کنڈآن اسیجائی کماشی ءِ کیک۔ ’جے۔ایم۔سی‘ نا دیوان اٹی کامرس، زرکاری، توانائی، پیشن نا ملک ملازمت، کشت وکشار، حوالکاری و شینکاری، سیل و سوات تون اوار تین پہ تینی است خواہی نا چندی بشخ آتے ٹی ہڑتوم آ کنڈآتا کمکاری آ گپ وتران کننگک۔ دادورہ ٹی وزیرخارجہ مخدوم شاہ محمود قریشی بحرین نا وزیرخارجہ ڈاکٹر عبدالطیف بن راشدالزیانی تون اوار بحرین نا سرکڑدہ غاتون اوڑدہی کیک و اوفتے تون ہڑتوم آ کنڈآتا تعلقداری تا مون آ دننگ تون اوار تین پہ تینی است خواہی نا علاقائی و جہانی باندات آ گپ وتران کیک۔ وزیرخارجہ پارے کہ پاکستان و بحرین اٹ اسیجائی عقیدہ و قدر انا بنداو آ خڑکی برادرانہ تعلقداری ءِ۔ بحرین نا فرمانرواشاہ حمد بن عیسی الخلیفہ نا سلہ غا دسمبر 2019ء ٹی وزیراعظم عمران خان نابحرین نا دورہ غان پد آن بحرین تون ہڑتوم آکنڈآتا تعلقداریک پوسکن آ بڑزی تا کنڈآہِننگ ءُ۔ دادورہ ٹی وزیراعظم عمران خان ءِ بحرین نا بڑزکو شرف”کنگ حمد آرڈر آف رینائینس“ تننگا۔ پاکستان و بحرین تین پہ تینی فائدہ ٹی ہڑتوم آ کنڈآتا تعلقداری تے پین سوگو کننگ کن کوشست کننگ ءُ۔ اومیت ءِ کہ وزیرخارجہ مخدوم شاہ محمود قریشی نا دورہ ہڑتوم آ ملک آتا برادرانہ تعلقداری تا مثبت رفتار ءِ پین مون آ دننگ اٹ کمکار مریک۔
