راولپنڈی۔ 28جولائی (اے پی پی) راولپنڈی و کیبی علاقہ غاتے ٹی چارشنبے نا سہب انا وختی ترند پِر آن ودی مروک آ حالیت آتا جاچ ءِ ہلنگ کن بنجائی وزیر داخلہ شیخ رشید احمد سہب انا وختی گوالمنڈی نالہ لئی پول آ سرمس۔ داوخت آ اوڑتون اوار کمشنر راولپنڈی گلزار حسین شاہ، ڈپٹی کمشنر عامرعقیق، ایم ڈی واسا راجہ شوکت محمود، ڈسٹرکٹ ایمرجنسی آفیسر ریسکیو1122علی حسین و ایلو تعلقدار آفیسر آک ہم ساڑی ئسر۔ داوخت آ بنجائی وزیر داخلہ شیخ رشید احمد میڈیا تون گپ وتران کرسا پارے کہ ہروڑنا نوکاپی حالیت آتون مون تننگ کن واسا، ریسکیو1122، میونسپل کارپوریشن، ضلعی انتظامیہ تون اوار غٹ تعلقدار ادارہ غاک الرٹ ءُ و راولپنڈی و اسلام آباد اٹی ہراڑے کہ نوکاپی حالیت آک ءُ ہموڑے فوج انا دستہ ہم بسنے، فوج ہم الرٹ ءِ، واساہم الرٹ ءِ و کارپوریشن نا عملہ تون اوار غٹ انتظامیہ ڈیوٹی آٹی ءُ۔ نالہ لئی ءِ بیست سال آن پد دوسد بندغ آتا جان ءِ ہلیک، داڑآ بیست سال مست نن کاریم نا بناءِ کریسن، داسکان کاریم بناکتنے، عمران خان اِرامسہ میٹنگ کرینے، عثمان بزدار ہم کرینے نیسپاک ءِ ہم دمدستی وڑاٹ پاننگانے کہ داڑآ کم خڑچ انا خڑچہ کننگے و داڑے انشاء اللہ داڑے اخس کہ غریب خلق آک ءُ داگچین مریرہ و دامخلوق نہادی مریرہ، نالہ لئی آ زیات آن زیات نود دے اٹی کاریم بناکیک، نالہ لئی راولپنڈی نا اسٹ انگا ویل ءِ ہراداسکان ایسر متنے ہراتم ای بناکریسٹ تو 26ارب نا ئس داسہ دا نود ارب روپئی آ سرمسنے۔ اسہ سوج اسے نا ورندی ٹی بنجائی وزیر پارے کہ اسلام آباد نا نالہ کورنگ تون اوار ایلو نالہ غاتیا مخلوق کوزہ کرینے، نالہ لئی سہی مننگ والا ءِ و کنا زند انا ہندااسہ آخیریکو مشن ءِ کہ نالہ لئی آ کاریم بناکے، راولپنڈی نا ایلوکاریمک پورو مسنو، راولپنڈی ٹی مسٹ میکو یونیورسٹی ہم جوڑ مننگ والا ءِ۔ نالہ لئی ایکسپریس وے آ نود دے انا تہہ ٹی کاریم بناکیک۔ داوخت آ ایم ڈی واسا راجہ شوکت محمود بنجائی وزیر ءِ پارے کہ واسا نا غٹ عملہ نن نیمہ غان غٹ مشینری تتون اوار ڈیوٹی آ ساڑی ءُ۔ و دیر انا نکاسی کن ہیوی مشینری تا کاریم اٹ اتنگ برجاءِ۔ اوپارے کہ پِرانا سلنگ آن پد نالہ لئی ٹی دیر انا کچ پدریسہ کم مننگ ءِ و داوخت آ گوالمنڈی پول آ دیر انا کچ 13فٹ بڑز وخت اس کہ کٹاریاں ٹی یانزدہ ءُ نیم فٹ بڑز ءِ۔ داکان مست ریسکیو 1122نا جاری کروک حساب وکتاب نا رداٹ چارشنبے نا سہب انا وختی چار ءُ نیم بجہ غا پِر بناکرے ہراکہ نہہ بجہ اسکان برجائس اوکان پد سہب انا نہہ بجہ ءُ 43منٹ اسکان سید پور ولیج اٹ 126ملی میٹر پِر ریکارڈ کننگا، گولڑہ ٹی 103ملی میٹر بوکرہ ٹی 21ملی میٹر، ایچ ایٹ اٹی 68ملی میٹر، چکلالہ ٹی 17ملی میٹر شمس آباد اٹی 32ملی میٹر پِر ریکارڈ کننگا۔ دیر انا کچ کٹاریاں و گوالمنڈی ٹی پانزدہ ءُ نیم فٹ ریکارڈ کننگا۔ ڈسٹرکٹ ایمرجنسی آفیسر ریسکیو 1122علی حسین اے پی پی ءِ پارے کہ پِر انا بنامننگ تون ریسکیو مہالوآن الرٹ تینا ٹیم تے نہہ ہند آتیا روانہ کرے۔
