اسلام آباد۔ 28جولائی (اے پی پی) بنجائی وزیر حوالکاری و شینکاری چوہدری فواد حسین پارینے کہ سوگو اوغانستان نا کمک اٹ مچ آ ڈیہہ ءِ نیامی ایشیاو یورپ تون ملفنگ وزیراعظم نا وژن ءِ، نن زرگزرانی گچینی کن ڈیہہ ٹی امن و سوگوی خوانہ، پاکستان و اوغانستان ءِ تینا فائدہ غاتا فیصلہ ءِ تینٹ کروئی مریک، سپرپاور آک تینا گیم تے گوازی کرسا کارہ، بھرم ءِ تا ننے کنوئی تمک، پاکستان و اوغانستان نا مخلوق اسہ ایلوتون تاریخی رشتہ غاتے ٹی تفوک ءُ، ننا تعلقداری شیف و بڑزآن پد ہم سوگو ءُ۔ داخیال آتا درشانی ءِ او چارشنبے نادے آ داڑے پاک اوغان یوتھ فورم نا کنڈآن پاک اوغان میڈیا کانکلیو نا بنائی سیشن آن تران کرسا کرے۔ چوہدری فواد حسین پارے کہ اوغانستان و پاکستان نا مخلوق مذہبی، دودوربیدگی و جغرافیائی وڑاٹ اسہ ایلو تون تاریخی رشتہ غاتے ٹی تفوک ءُ۔ اوغانستان نا مخلوق ننا تینا و اسہ ہی قبیلہ نا مخلوق ءُ، اوفتے تون ننا خڑکی ءِ، ننا زبان و دودوربیدگ اسہ وڑءِ۔ اوغانستان تون ننا تعلقداری تیٹی تناؤہم مس و مہرومریبت ہم، ننا تعلقداری شیف و بڑزآن پد ہم اینوہم سوگو ءُ، ہنداننا تاریخ نا بشخ اسے۔ بنجائی وزیر حوالکاری پارے کہ تاریخ ءِ ہرفبو ہبو تو پاکستان و اوغانستان نا نیام اٹ تناؤنا کیفیت تاریخ نا جورئس۔ اوپارے کہ روس و امریکہ کابل آ کوزہ کریر و بھرم ءِ ننے کنوئی تما۔ القاعدہ نیویارک اٹ کارروائی کرے ہرانانتیجہ ٹی اوغانستان اٹی حالیت خراب مس، اوغانستان اٹی امریکہ نا پالیسی بے سہب مس تو اونا بھرم ءِ اوغانستان و پاکستان ہڑتوم آک کُننگ ءُ۔ بنجائی وزیر پارے کہ 1988ء ٹی ہراتم اوغانستان اٹی تنکی چٹا تو یو ایس ایس آر و امریکہ تو ہموکان ہنار ولے مچ آ بھاریم پاکستان و اوغانستان نا مخلوق ءِ سگوئی تما۔ چوہدری فواد حسین پارے کہ نن اوغانستان نا مخلوق تون کوپہ ءِ کوپہ تون ملفسا مون آ ہنان، پاکستان لکھ آ اوغان باہوٹ آتا مہمانداری ءِ کرے۔ اوپارے کہ پاکستان نا یونیورسٹی تیٹی شش ہزار نا خڑک اوغان طالب علم خواننگ ءُ۔ اینو دا چناک تینٹ پاننگ ءُ کہ پاکستان اوفتے وارخواہی فراوان کرے۔ داوخت آ 30لکھ آن زیات اوغان باہوٹ پاکستان اٹی ءُ، مستین اٹ نن کم و ود 50لکھ آن زیات اوغان باہوٹ آتا مہمانداری ءِ کرین ہرا اوغانستان نا آبادی نا اسہ بھاز بھلو بشخ اسے۔ چوہدری فواد حسین پارے کہ پاکستان نا فرض ئس کہ اوداجنگ اٹ اوغان الس تون تفے و نن ہمووڑ کرین۔ بنجائی وزیر حوالکاری پارے کہ اگہ اوغانستان نا حالیت خراب مریک تو داڑآن باہوٹ آتا اسہ پین تنکی اس ودی مریک۔ اوپارے کہ میڈیانا کمک اٹ اوغانستان و پاکستان نا مخلوق تینا نکتہ نظر ءِ پیش کننگ کیرہ و دانا کمک اٹ امن نا مسخت ءِ مون آ دننگ مریک۔ اوپارے کہ نن اوغانستان اٹی امن خوانہ، دابارواٹ ننا نکتہ نظر پیدوار ءِ۔ بنجائی وزیر پارے کہ سوگو اوغانستان نا کمک اٹ مچ آ ڈیہہ ءِ نیامی ایشیا و یورپ تون ملفنگ وزیراعظم عمران خان نا وژن ءِ۔ نن خوانہ کہ اوغانستان اٹی سوگو ی برے و داٹی نن گوادر آن ہلیس ازبکستان اسکان ریلوائی ٹریک شاغنگ کین۔ داڑآن نیامی ایشیاءِ گوادر و کراچی نا بندرگاہ و ننے نیامی ایشیانا مارکیٹ آتسکان رسینگ دوئی مریک۔ یورپی یونین و سی پیک ءِ اسہ ایلو تون گنڈنگ مریک۔ دانا نتیجہ ٹی پاکستان ڈاڈیہہ نا اقتصادی مرکز جوڑ مریک۔ اوپارے کہ ننن بھارت تون گچین تعلقداری خوانہ، ننا تعلقداری بھارت تون گچین مریک تو نن دنیا نا اِرا بھلا زرگزران تا نیام اٹ مرینہ۔ بنجائی وزیر حوالکاری پارے کہ اوغانستان اٹی امن و سوگوی آن واپار کن وارخواہی ودی مریک۔
