اسلام آباد۔ 28جولائی (اے پی پی) چیئرمین سینیٹ محمد صادق سنجرانی نا خصوصی سلہ غا عرب پارلیمنٹ نا صدر عادل بن عبدالرحمان العسومی نا کماشی ٹی 11باسکی ڈل پاکستان نا 5دے ئی دورہ کیک۔ سینیٹ سیکرٹریٹ نا رداٹ ڈل یکم اگست آ پاکستان آ سرمریک، تینا دادورہ ٹی عرب پارلیمنٹ نا ڈل انا صدر مملکت عارف علوی، وزیراعظم عمران خان، چیئرمین سینیٹ محمد صادق سنجرانی، وزیر خارجہ شاہ محمود قریشی و ایلو بڑزکو سرکڑدہ غاتون اوڑدہی تا گمانی ءِ۔ چیئرمین سینیٹ تینا اسہ بیان اسے ٹی پارے کہ عرب پارلیمنٹ اسہ بھاز اہم ءُ فورم اسے و پاکستان عرب پارلیمنٹ تون ہڑتوم آ کنڈآتا کمکاری ءِ پین مون آ دننگ نا خواہندار ءِ۔ اوپارے کہ عرب پارلیمنٹ نا صدر و اونا ڈل انا دورہ غان ہڑتوم آ کنڈآتا کمکاری ءِ پین مون آ دننگ کن کسر آوارمریک و ہندا ننا اسیجائی مسخت ءِ۔ چیئرمین سینیٹ پارے کہ پاکستان ڈیہہ ٹی شونداری و شونہالی کن رابطہ کاری ءِ بھاز اہم تکک و بڑزکو کہول آ ڈل آتا ہن و بر آن ویل آتے ایسر کننگ و راجی آسراتی نا عمل ءِ ترند کننگ اٹ کمک رسینگک۔ چیئرمین سینیٹ دااومیت نا درشانی ءِ کرے کہ عرب پارلیمنٹ نا ڈل انا دادورہ بھاز فائدہ ئی مریک و آخبت اٹ دانا جوان ءُ بھرم اس دوئی مریک۔
