اسلام آباد۔ 28جولائی (اے پی پی) وزیر مملکت حوالکاری و شینکاری فرخ حبیب پارینے کہ 4سال آن زیات وخت گدرینگا پیپلزپارٹی و مسلم لیگ ن تینا فارن فنڈنگ نا ریکارڈ ءِ الیکشن کمیشن اٹ جمع کرفتنو، اسٹیٹ بینک انا تروک آ ریکارڈ نا رداٹ ہڑتوم آ پارٹی تا 19اکاؤنٹ ہندن ءُ ہرا گوشوارہ غاتے ٹی پاش کننگتنو، دااکاؤنٹ آک منی لانڈرنگ، کالادھن ءِ پیہن کننگ کن کاریم اٹ اتنگار، دااکاؤنٹ آتے ٹی ارب آتا ٹرانزیکشن مسنے، بھارتی اودیم ایجنسی را،نا حمداللہ محب کون آ دیہاڑی دار آتون اوڑدہی، مودی نا ایجنڈاءِ مون آ دننگ، حریت راہشون آتیان مری تون اوار ملک دشمن بیانیہ غا آزاد کشمیراٹی مسلم لیگ ن ءِ عبرتناک شکست مسنے، داسہ ن لیگ دھرنا ایتے یا برانز کے کشمیریک تینا فیصلہ ءِ بنفینو۔ اوچارشنبے نادے آ الیکشن کمیشن نا پیشن میڈیا تون گپ وتران کریکہ۔ وزیر مملکت حوالکاری و شینکاری فرخ حبیب پارے کہ نن الیکشن کمیشن اٹ درخواست دائرکریسن کہ مسلم لیگ ن و پیپلزپارٹی نا فارن اکاؤنٹ آتسکان فنانشل ایکسپرٹ و چارٹر اکاؤنٹ آتے جانچ پڑتال کن رسائی تننگے۔ پی ٹی آئی نا اکاؤنٹ آتسکان مستین اٹ چارٹرڈاکاؤنٹ آتے رسینگ تننگاسس نن ہم داآسراتی ءِ خواہنگ اُن۔ اوپارے کہ سٹیٹ بینک ہراریکارڈ ءِ جمع کرفینے اونا رداٹ مسلم لیگ ن نا 12و پیپلزپارٹی نا 7ہندن ءُ فارن اکاؤنٹس ءُ ہرافتے گوشوارہ غاتے ٹی پاش کننگتنے۔ اوپارے کہ ریاضی نا بشخ اٹی مسہ پوسکن ءُ ریاضی دان فاروق حیدر، شاہدخاقان عباسی و احسن اقبال نا دروشم اٹ مون آ بسنو، ہراپوسکن ءُ ریاضی اس درستی راستی کرفنگ نا بے سہب کوشست کریرہ، 2013ء نا گچین کاری تیٹی پی ٹی آئی نا وونٹ زیات ئسر و سیٹ آک کم ئسر، ن لیگ ءِ پی ٹی آئی و تینا مخالف تموک آ ایلو وونٹ آتے جمع کننگ کن بفک۔ اوپارے کہ کشمیراسہ پرامن، جہد کننگ و قربانی تروک آ تا علاقہ ءِ، مریم صفدر خارانا بیانیہ ءِ چلیفنگ نا کوشست کرے و کشمیر نا دلیر سفیر و سچا وکیل ءِ حرف تنقید نا شست کرے، اونا مچ آ گچین کاری مہم ءِ ہبو، اواسہ جاگہ اس ہم تینا انکل مودی یا آرایس ایس نا نظریہ نا مذمت اسکان کتنے و نریندر مودی بھارت نا غیرکانودی کوزہ ٹی جموں و کشمیر اٹی ہراظلم ءِ کننگ انگ ءِ اوڑآہم خاموشی اختیار کرینے۔ اوپارے کہ اینو لڑونج لڑونج ہیت کروک آ راجہ فاروق حیدر پائے کہ انت اودے ہرا پنچ سال حکومت نا موقع ملا انت او غلامی نا حکومت ئس، انت برہان وانی، سید علی گیلانی، میر واعظ عمرفاروق، آسیہ اندرابی تون اوار لکھ آ کشمیری تا جہد غلام حکومت کن ءِ، ن لیگ نا ہنداسوچ ءِ کشمیریک وونٹ انا زور اٹ مسترد کریر۔ اوپارے کہ الیکشن آن مست گیلپ سروے نا رداٹ 44 درسد وونٹ پی ٹی آئی، 12درسد ن لیگ و 9 درسد پیپلزپارٹی ءِ ملنگ نا پیشن گوئی کننگا ہرا اسُل راست پک مس، پی ٹی آئی تون داہڑتوم آ جماعت آتا ہچ ءُ مقابلہ اس الوکہ بلکن اسل اٹ ن لیگ و پیپلزپارٹی نا ارٹ میکو و مسٹ میکو پوزیشن کن اسہ ایلو تون مقابلہ ئس، آخبت ہم اوفتا مقابلہ اپوزیشن لیڈر نا سیٹ اکن مرسا کیک۔
