اسلام آباد۔ 27جولائی (اے پی پی) پاکستان و سعودی عرب ہڑتوم آ کنڈآتا تعلقداری نا سوگوی کن بڑزکو کہول انا رابطہ نا چرجوئی آ امنا کرینو، ہڑتوم آ ملک آتا نیام اٹ ڈل آتا کہول آ مذاکرات سے شنبے نادے آ وزارت خارجہ ٹی مس۔ سعودی عرب نا ڈل انا کماشی ءِ سعودی وزیر خارجہ شہزادہ فیصل بن فرحان آل سعود وخت اس کہ پاکستان ڈل انا کماشی ءِ وزیرخارجہ مخدوم شاہ محمود قریشی کرے۔ دفترخارجہ نا رداٹ دامذاکرات اٹ ہڑتوم آ کنڈآتا تعلقداری و کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا اہم علاقائی و جہانی باندات آتیا شرہ مس۔ وزیرخارجہ سعودی ہم منصب شہزادہ فیصل بن فرحان آل سعود و اونا ڈل ءِ وزارت خارجہ غا بننگ آ بخیر اٹ پارے۔ شاہ محمود قریشی پارے کہ پاکستان و سعودی عرب نا نیام اٹ اسیجائی مذہبی، دودوربیدگی و تاریخی قدر آ استوار برادرانہ تعلقداری ءِ۔ ہڑتوم آ ملک آک ہر مشکل وخت اٹی اسہ ایلو تون پبی تفینو۔ وزیرخارجہ پارے کہ پاکستان، سعودی عرب نا وتواجہی و علاقائی سالمیت نا رکھ انا مخ تفی ءِ برجاتخنگ کن سنبرینگوک ءِ۔ پاکستانی تا است آتے ٹی سعودی عرب و خادمین حرمین شریفین کن والہانہ عقیدت ارے، ہنداخاطرآن نن سعودی عرب نا شونہالی و شونداری ءِ تینا شونداری تون تکنہ۔ وزیرخارجہ ڈیہہ ٹی امن خاص کر خلیجی ملک آتا نیام اٹ جھیڑہ غاتا ایسری کن سعودی عرب نا متحرک کڑد انا ستاءِ کرے و پارے کہ کشمیر نا ویل و مقبوضہ کشمیرا ٹی بھارت نا کنڈآن چست کروک آ 5اگست 2019ء نا اسہ کنڈی و غیر آئینی گام گیج آتیان پد سعودی عرب نا علاقائی و جہانی فورم تیا پاکستان نا موقف نا مخ تفی ستاکڑزک۔ شاہ محمود قریشی پارے کہ او آئی سی کنٹکٹ پڑک جموں و کشمیر اٹی سعودی عرب نا مثبت کڑد آ سعودی سرکڑدہ غاتا منت وار ءِ۔ اوپارے کہ سویلی ایشیاتون اوار مچ آ دنیا ٹی رہینگوک آ مسلمانک تینا حق انا رکھ اکن تینا اومیت آتے سعودی سرکڑدہ غاتون وابستہ کرینو۔ وزیرخارجہ مخدوم شاہ محمود قریشی وزیراعظم عمران خان نا دورہ سعودی عرب و سعودی ولی عہد شہزادہ محمد بن سلمان نا دورہ پاکستان نا حوالہ ءِ ترسا پارے کہ بڑزکو کہول انا رابطہ غاتیان پاکستان و سعودی عرب نا نیام اٹ تعلقداری تے وسعت ملا۔اوپارے کہ مشکل حالیت آتے ٹی سعودی عرب نا کنڈآن پاکستان ءِ تروک آ کمکاری آ سعودی سرکڑدہ غاتا منت وار اُن۔ ہڑتوم آ کنڈآتا سیاسی، اقتصادی، زرکاری نا وارخواہی و دفاعی کمکاری نا مون آ دننگ نا بابت سرجم گپ وتران مس۔ وزیرخارجہ پارے کہ چندی بشخ آتے ٹی ہڑتوم آ کنڈآتا کمکاری ءِ مون آ دننگ کن سپریم کوآرڈنیشن کونسل نا جوڑ کننگ آ عملی گام گیج آتا بناستاکڑزک۔ مذاکرات اٹی اوغانستان آن درملکی فوج انا کشنگ آن پد حالیت آتیا ہم گپ وتران مس۔ وزیرخارجہ پارے کہ پاکستان، ڈیہہ ٹی امن و سوگوی نا خواہندار ءِ، اوغان ویل انا پرامن ایسری کن جہانی برادری اوغان سرکڑدہ غاتیا زور شاغے کہ او جامع مذاکرات نا کمک اٹ اوغان ویل انا پرامن سیاسی ایسراس کشر۔ شاہ محمود قریشی پارے کہ پاکستان اٹ گچین حکومتی حکمت عملی نا سوب آن کورونا دین انا حالیت، ڈیہہ نا ایلو ملک آتا نسبت بھاز جوان ءِ۔ اومیت ءِ کہ داحالیت آتے مون آ تخسا، پاکستانی تیکن سعودی عرب نا کنڈآن خلوک ویزہ پابندی تیا نظرثانی کننگک۔ ہڑتوم آ کنڈآک ہڑتوم آ کنڈآتا تعلقداری تا سوگوی کن بڑزکو کہولی رابطہ غاتا چرجوئی آ امناکریر۔
