کوئٹہ۔ 15جولائی (اے پی پی) پارلیمانی سیکرٹری جان جوڑی ڈاکٹر ربابہ خان بلیدی بلوچستان نا نوکاپ و پرتیان زہمی علاقہ غاتے ٹی مربوط طبی آسراتی تا فراوانی کن ہلہلہ ئی گام گیج کننگ نا پارت کرینے، تینا اسہ تاکیدی مراسلہ سے ٹی پارلیمانی سیکرٹری جان جوڑی پارے کہ بلوچستان نا گڑاس علاقہ غاتے ٹی پِر و نوکاپ نا سوب حالیت آک سنگین ءُ زہمی علاقہ غاتا الس ءِ نوکاپی دیر و چاگڑدی کچٹی نا سوب آن دینی مرض آتیان بچفنگ و درمان کن بھلا گام گیج آتا گرج ءِ، دارداٹ زہمی علاقہ غاتا ضلعی آفیسر آک جان جوڑی نا ہندن ءُ عمل نا قابل حکمت عملی اس مرتب کیر ہراڑآن طبی سروس آتا بے سلنگ آن فراوانی نا چرجوئی برجاسلنگ کے۔ اوپارت کرے کہ زہمی علاقہ و اوفتا خڑک انا ڈسٹرکٹ و تحصیل ہیڈکوارٹرہسپتال آتے ٹی دُوشہ کُننگ نا انجیکشن تون اوار المی دوائی تا دوئی کننگ ءِ پک کننگے و ہروڑنا مشکل حالیت اٹ تعلقدار سیکرٹری جان جوڑی آفس ءِ معلومدار کننگے اوپارے کہ پِرو آفت آتیان زہمی علاقہ غاتے ٹی طبی عملہ نا حاضری ءِ پک کننگے و غٹ چھٹی تے منسوخ کرسا دوئی اسٹاف ءِ جتا وخت ءُ پاس اٹ 24گھنٹہ بے سلنگ آن زمواری تننگے۔ ڈاکٹر ربابہ خان بلیدی پارے کہ پِر و نوکاپ آن زہمی علاقہ غاتا ضلعی جان جوڑی آفیسر آک تینا تینا پروگریس رپورٹ آن محکمہ نا بڑزکو آفیسر آتے ہڑدے ئی بنداو آ معلومدار کیر داوڑنا بھلا حالیت آتے ٹی ہیلتھ تون وابستہ ہر بندغ ءِ پورو تندہی و خواری اٹ کاریم کرسا مون تروک چیلنج آتون مون تروئی مریک۔
