تاشقند۔ 15جولائی (اے پی پی) سیکرٹری زرکاری بورڈ فرینہ مظہر پارینے کہ واپاری ڈل انا دورہ ازبکستان سرسہب مسنے، ازبک حکومت و کاروباری برادی پاکستانی ڈل ءِ جم وجوش اٹ بخیر کرینو۔ پاکستان و ازبکستان نا کاروباری و صنعتکار برادری تین پہ تینی شریداری اٹ اسیجائی ڈٹ آتیا اومیت آن پُرءُ۔ وزیراعظم عمران خان نا دورہ ازبکستان نا وخت آ پاکستان ازبکستان بزنس فورم نا بابت فرینہ مظہر تینا ویڈیو کلہو اٹی پارے کہ ہڑتوم آ ملک آک اسہ ایلو نا آزموندہ غاتیان فائدہ ہرفنگ نا رداٹ فوڈ، ٹیکسٹائل سیکٹر آتے ٹی اسیجائی ڈٹ آتا بناءِ کننگ کیرہ۔ اوپارے کہ ریلوائی نا ڈٹ آتے ٹی بھاز است خواہی نا درشانی ءِ کننگ انگ ءِ۔ پاکستانی بندرگاک ازبکستان کن بھاز پرکشش مننگ کیک انتئے کہ ازبک برآمد کنندگان تینا واپار ءِ پاکستانی بندرگاہ تا کمک اٹ ودفنگ کیرہ۔ اومستی پارے کہ پاکستان و ازبکستان 2006ء ٹی زرکاری نا ایم او یو آ سائن کریسر ولے داسہ ساڑی آ دورہ ٹی نن دُوارہ ای او یو کینہ انتئے کہ مہالو والا نا معیاد چٹانے۔ اسہ سوج اسے نا ورندی ٹی اوپارے کہ اِراتُواٹی اولیتی واپار نا معاہدہ (پی ٹی اے) ءِ گڈیکو دروشم اس تننگک انتئے کہ ہڑتوم آ ملک آک پی ٹی اے نا بابت زوت آن زوت گام گیج آتے گڈیکو دروشم اس تننگ نا خواہندار ءُ و داڑآ امنائی سلاہ ہم ساڑی ءِ۔ اومستی پارے کہ پاکستان و ازبکستان اسہ ایلو نا آزموندہ غاتیان فائدہ ہرفر۔ ازبکستان نا علاقائی واپار نا چیمبر تون گنڈوک زالبول کاروباری شخصیت پارے کہ دافورم اٹ چیمبر نا 10باسکی ڈل اٹی 2زالبول اوار ءُ۔ اوپارے کہ نن خاص وڑاٹ انفارمیشن ٹیکنالوجی و ٹیکسٹائل نا بشخ اٹی پاکستان تون کاروبار ءِ ودفنگ نا است خواہی تخنہ۔ اوپارے کہ ازبکستان و پاکستان نا کاروباری زالبول آتا نیام اٹ واپار و بزنس نا بشخ آتے ٹی تعلقداری تے بایدے مون آ دننگے۔ ننے اومیت ءِ کہ دافورم نا اڈتننگ آن ہڑتوم آ ملک آتا زالبول پوریاگر و کاروباری شخصیت آتا نیام اٹ رابطہ غاتے مون آ دننگ دوئی مریک۔ ازبکستان نا پنی آ کاروباری شخصیت میر گل عثمانوف داوخت آ پارے کہ ہڑتوم آ ملک آتا اسیجائی بزنس فورم ستاکڑزک۔ فورم نا اڈتننگ آن ازبکستان نا پوریاگر و زرکارآتے نئے بیرہ پاکستانی منڈی تا بارواٹ گچین معلومداری دوئی مریک بلکن پاکستان نا کسر دنیا نا ایلو ملک آتون واپار ءِ ودفنگ نا وارخواہی ہم مون آ بریک۔
