اسلام آباد۔ 15جولائی (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ کورونا رسک الاؤنس نا اطلاق غٹ فیڈرل نا ہسپتال آتے ٹی مریک، غٹ میڈیکل ورکرآک ہرافک کوویڈ۔ 19نا دین انا تالانی ٹی تینا جون تا پرواہ ءِ کننگ آن بیدس ناجوڑ آتا خیالداری ٹی ہچ ءُ کمتی اس کتور، ننا ہیروک ءُ، کوویڈ۔ 19نا ریسہ غان داتم اسکان نا حالیت و اونا مقابلہ ءِ کننگ اٹ ہیلتھ کیئرورکرآتا بھلو دُواسے و مچ آ دنیاٹی ننے ہراشاباشی ملنگ ءِ او پیرامیڈیکل اسٹاف، ڈاکٹرز، نرس و غٹ ہیلتھ کیئرورکرآتا خذمت آن بیدس مننگ کتوکہ۔ داخیال آتا درشانی ءِ او پولی کلینک ہسپتال اٹی ساڑی پیرامیڈیکل اسٹاف نا برانزی دھرنہ غان تران کرسا کرے۔ اوپارے کہ غٹ میڈیکل اسٹاف ءِ کورونا رسک الاؤنس بایدے ملوسس، دانا ملنگ اٹ ہرے مس ولے داکنا قول ءِ کہ دانمے ملک۔ اوپارے کہ کورونا رسک الاؤنس اٹ ہرے مس جوان ءُ ہیت اس اف ولے تدوک آ دے تا الاؤنس ہم نمے ملک۔ اوپارے کہ داتُوانا ایسر اسکان غٹ ریسہ غاتے پورو کننگک تانکہ نمے پین تاخیر تون مون تروئی تمپ۔ اوپارے کہ ننے لگاتار فنڈ انا فراوانی مرسا کیک ہراتم اسکان دادین ساڑی ءِ داالاؤنس نمے ملسا کیک۔ اوپیرامیڈیکل اسٹاف آن خواست کرے کہ دین داسکان ارے ہنداخاطرآن نم تینا خذمت آتے برجاتخبو۔ اوپارے کہ کورونا رسک الاؤنس نا اطلاق فیڈرل نا غٹ ہسپتال آتے ٹی مریک۔ اوپارے کہ دانمے آ احسان اس اف دانما حق ءِ۔ نمے سلام ءِ کہ دا مشکل حالیت آتے ٹی ہم نم تیناخذمت آتے برجاتخانورے۔ اوپارے کہ دین داسکان ختم متنے۔ ماسک انا کاریم اٹ اتنگ ءِ برجاتخبو۔
