اسلام آباد۔ 15جولائی (اے پی پی) بنجائی وزیر کانود و انصاف بیرسٹر ڈاکٹر فروغ نسیم پارینے کہ ترکی و پاکستان مچ آ دنیاٹی امن اٹ شریدار ءُ، پاکستان و ترکی ایلم ءُ، پاکستان و ترکی جہانی فورم تیا اوار سلوک ءُ۔ داخیال آتا درشانی ءِ او پنچ شنبے نادے آ ترکش کوآپریشن اینڈ کوآرڈنیشن ایجنسی ٹیکا نا کنڈآن ترکی نا یوم جمہوریت و قومی وحدت نا دودآن تران کرسا کرے۔ اوپارے کہ پاکستان و ترکی اِراملک اسہ قوم اسے ءُ۔ پاکستان و ترکی ایلم ءُ۔ پاکستان جمہوریت نا بالادستی نا جنگ اٹ ترکی تون تفے۔ اوپارے کہ پاکستان و ترکی جہانی فورم تیا اسہ ایلو تون اوار سلیسر و داٹی کس اسے ابہام مف کہ ہڑتوم آ ملک آک جہانی فورم تیا اوار سلوک ءُ۔ ترک ایلمک دہشت گرد تنظیم نا نرزوری اٹ مقابلہ ءِ کریر۔ بنجائی وزیر پارے کہ جمہوریت نا جنگ اٹ سد آتا کچ اٹ شہید و ٹھپی مروک آ ترک ایلم تے سلام پیش کیوہ۔ اوپارے کہ ننا سپریم کورٹ ءِ سلام ءِ ہراترکی آ جلہو کروک آ تنظیم نا اسکول نا نوٹس ءِ ہلک و سپریم کورٹ ترک تنظیم نا کنڈآن اسکول آتے بند کرفے و دا فتے معارف فاؤنڈیشن نا دوٹی تننگا۔ ترک قوم جمہوریت کن سڑک آتیا پیش تمار۔ ترکی نا وزیراعظم رجب طیب اردوان کیہی وار پاکستان نا دورہ ءِ کرے۔ ترکی و پاکستان مچ آ دنیاٹی امن اٹ شریدار ءُ۔ دود آن تران کرسا پاکستان اٹ ترکی نا سفیر مصطفی یرداگل پارے کہ پنچ سال مست اینونادے ترک قوم جمہوریت کن روڈ آتیا پیش تما و گچین مروک آ نمائندہ غاتون تفیر۔ ترک الس جمہوریت کن تینا جون تے ندر کریر۔ اوپارے کہ جمہوریت بیرہ ترکی کن آخا مچ آ دنیاکن درور اسے۔ ہرافک ملک انا سالمیت کن جون تے ندرکریر اوفتے خراج تحسین پیش کینہ۔ داوخت آ بنجائی وزیر کانود و انصاف بیرسٹر ڈاکٹر فروغ نسیم ترکی نا شہید آتا یات اٹی ایف نائن پارک اٹی نیال اس ہم خلک۔
