تاشقند۔ 15جولائی (اے پی پی) ازبکستان اٹی پاکستان نا سفیر سید علی حسن گیلانی پارینے کہ وزیراعظم عمران خان نا دورہ ازبکستان تزویراتی اہمیت تخک، ازبکستان نیامی ایشیانا ارٹ میکو بھلو زرگزران ءِ، ازبکستان پاکستان نا بندرگاہ تا کمک اٹ دنیا اسکان رسینگ خواہک، ڈیہہ ٹی ہڑتوم آ ملک آتا اہم ءُ کڑد اسے، دورہ ٹی چندی بشخ آتے ٹی معاہدہ و مفاہمت نا یات داشت آتیا دستخط مریک۔ وزیراعظم نا دورہ ازبکستان نا بابت اسہ ویڈیو کلہو اسے ٹی اوپارے کہ وزیراعظم عمران خان اِرادے ئی دورہ غا تاشقند آ بننگ ءِ۔ او ثمر قند و بخاراغاہم کاہک۔ دااسہ بے کچ تزویراتی ءُ اہمیت نا دورہ اسے و ہڑتوم آ ملک آتا تعلقداری تے سٹریٹجک کہول آ سوگو کننگک۔ اوپارے کہ وزیراعظم نا ازبکستان اٹی اہم اوڑدہی مریک ہراٹی سیاست، دودوربیدگ، زرگزران، دفاع، تعلیم و ایلو بشخ آتے ٹی کمکاری ءِ مون آ دننگ کن سرجم گپ وتران مریک۔ داوخت آ مفاہمت نا یات داشت و معاہدہ غاتیاہم دستخط مریک و اسہ اسیجائی ءُ بیان اعلامیہ غاہم دستخط کننگک ہراٹی ہڑتوم آ ملک آتا آخبت نا تعلقداری نا احاطہ ءِ کننگک۔ اوپارے کہ تدوک آ منہ سال اٹی ازبکستان و پاکستان نا تعلقداری تیٹی پیدوار و مثبت بدلی بسنے۔ ہڑتوم آ ملک آک اسہ ایلو نا بھاز خڑک بسنو۔ ازبکستان پاکستان نا بندرگاہ تا کمک اٹ دنیا اسکان رسینگ خواہک و پاکستان ازبکستان نا کمک اٹ نیامی ایشیاو یورپ نا ملک آتے تینا برآمدآتے ودفنگ خواہک۔ اوپارے کہ داڑے درو اِرا اہم اوڑدہی مس ہرافتے ٹی اساسہ بین الحکومتی کمیشن و کاروباری شخصیت آتا اوڑدہی ءِ داڑکن 150کاروباری شخصیت تاشقند آ سرمسنو و لکھ آ ڈالرز نا معاہدہ مسنے۔ اوپارے کہ ڈیہہ ٹی پاکستان و ازبکستان نا اہم ءُ کڑد اسے۔ ڈیہہ ٹی ہراچاگڑد ءِ اوڑآہم گپ وتران مریک و آخبت نا حکمت عملی اس طے کننگک۔ اوپارے کہ پاکستان نا نیامی ایشیانا غٹ ملک آتون تعلقداری سوگو مننگ ءِ، خاص وڑاٹ ازبکستان ءِ نیامی ایشیاٹی مرکزی حیثیت اس دوئی و دا نیامی ایشیانا ارٹ میکو بھلا زرگزران ءِ تو داسوب آن پاکستان و ازبکستان نا تعلقداریک اسہ بھلو اہمیت اس تخرہ۔ پاکستان نا ازبکستان تون تعلقداری ودک، ازبکستان نا داوڑنا تعلقداری بیرہ 6ملک آتون ءِ۔ اوپارے کہ ہڑتوم آ ملک آتا سرکڑدہ غاک تعلقداری تے سوگو کننگ کن پبی کوشست کرینو، و تدوک آ 7،8تُواٹی بھلو بدلی اس بسنے و بروک آ دے تیٹی ننا تعلقداری گچینی نا کنڈآ کاہک۔ اوپارے کہ وزیراعظم عمران خان نا بھاز بے چینی اٹ انتظار ءِ کننگ انگ ءِ و ازبکستان اٹی وزیراعظم ہرانگیاکہ کاہک ہموڑے پاکستان نا بیرک ءِ چست کننگ انگ ءِ و غٹ اہم ہند آتیا ایل ای ڈی تا کمک اٹ پاکستان نا بابت دستاویزی فلم چلیفنگ انگ ءِ۔ اوپارے کہ ازبک الس وزیراعظم نا دادورہ ءِ بھلو اہمیت اس تننگ ءُ و داڑے وزیراعظم ءِ جم وجوش اٹ بخیر کننگک۔
