اسلام آباد۔ 14جولائی (اے پی پی) وزیراعظم عمران خان پارینے کہ میراتی سرٹیفکیٹ آتا جاری کننگ آن الس کن آسانی ودی مریک، حکومت نا اسل مسخت الس کن آسانی ودی کننگ ءِ، کوشست ءِ کہ الیکشن اٹ ای وونٹنگ نا کمک اٹ اوورسیز پاکستانیک وونٹ کاسٹ کننگ کیر، ای وی ایم مشین تا کاریم اٹ اتنگ آن شفافیت بریک۔ وزیراعظم چارشنبے نادے آ پنجاب اٹی میراتی سرٹیفکیٹ آتا جاری کننگ نا دود آن تران کریکہ۔ دود اٹی بنجائی وزیر حوالکاری و شینکاری چوہدری فواد حسین، وزیر داخلہ شیخ رشیداحمد، وزیر کانود و انصاف بیرسٹر فروغ نسیم و چیئرمین نادرا طارق ملک ئسک ہم ساڑی ئسر۔ وزیراعظم پارے کہ ننا کوشست ءِ کہ نظام اٹی ای گورننس اتین، ٹیکنالوجی نا کاریم اٹ اتنگ آن ہرکاریم اٹ ترندی اتنگ مریک، اوپارے کہ حکومت مخلوق نا خراج نا پیسہ غاتے اٹ کاریم کیک، الس کن ہرکاریم مشکل مریک ہرااوفتے کن تکلیف نا سوب ءِ۔ میراتی سرٹیفکیٹ نا نادرانا کمک اٹ جاری کننگ اسہ بھلو گام اسے، اوداسہ نارمل وڑاٹ دادے دوئی کننگ کیرہ، خاص وڑاٹ پیشن نا ملک آتے ٹی رہینگوک آ پاکستانی تے میراتی سرٹیفکیٹ نا دوئی کننگ اٹ آسانی مریک۔ وزیراعظم عمران خان پارے کہ ٹیکنالوجی ٹی انقلاب بسنے۔ ای خواوہ کہ نن پوسکن آ ٹیکنالوجی ءِ کاریم اٹ اتین انتئے کہ انفارمیشن ٹیکنالوجی ننکن آسانی ودی کرینے۔ اوپارے کہ شوکت خانم کینسر ہسپتال اینو آن 20سال مست ان ہاؤس سافٹ ویئر اس تیار کرے ہراڑآن مچ آ ہسپتال پیپر لیس مس، دانا غٹ آن بھلا فائدہ دامس کہ وڈی خوری نا گمان چٹا، داٹی دا مننگ کتوکہ کہ جعلی رسیدجوڑ مسکہ۔ وزیراعظم عمران خان پارے کہ نن خوانہ کہ ننا حکومت اٹی ای گورننس اتنگے، داڑے فائل گم مریک ولدا خاخر لگک، لینڈریکاراسکان ءِ خاخر لگک۔ ای گورننس آن دا مچ آ سسٹم داڑآن بچنگ کیک۔ دود آن بنجائی وزیر کانود و انصاف بیرسٹر فروغ نسیم ہم تران کرے، داہیت پاننگ نا سوب ءِ کہ میراتی سرٹیفکیٹ نا نادرا نا کمک اٹ جاری کننگ حکومت نا کنڈآن الس کن اسہ بھلو گام اسے ہراٹی کانودی وارث آک عدالت آتون رابطہ کننگ آن بیدس نادراغان 15دے انا تہہ ٹی میراتی سرٹیفکیٹ ءِ دوئی کننگ کیرہ۔ داگام وزیراعظم عمران خان نا داویژن نا بشخ ءِ ہرا شاری تے اوفتا روا حق بیدس وخت دوئی کننگ ءِ پک کیک۔ داگام آن عدالت آتیا مقدمہ غاتا بھاریم کم مریک و وارث آتے تینا روا کانودی حق زوت و آسان وڑاٹ دوئی مریک۔ دانظام خاص وڑاٹ پیشن نا ملک آتے ٹی رہینگوک آ پاکستانی تیکن خاص فائدہ تخک ہرافتے مہالو میراتی سرٹیفکیٹ دوئی کننگ کن پاکستان آ بروئی تماکہ۔ داسہ او پیشن نا ملک اٹی ہی بائیو میٹرک پک آن سرٹیفکیٹ دوئی کننگ کیرہ۔ اسلام آباد اٹی دانظام نا سرسہبی آن پد پنجاب، سندھ وخیبرپختونخواہم داکانود ءِ تینا صوبہ غاتے ٹی اختیار کرینو۔ صوبہ پنجاب دارداٹ غٹ کانودی گرج آتے پورو کرینے و داسہ صوبہ ٹی غٹ ضلع غاتے ٹی ساڑی نادرا سینٹرمیراتی سرٹیفکیٹ جاری کننگ نا مجاز ءُ۔ وزیراعظم عمران خان نا کنڈآن پنجاب اٹی میراتی سرٹیفکیٹ آتا جاری کننگ نا دود اٹی بشخ ہلوک آتے اسہ گونڈ ءُ ویڈیو اس ہم نشان تننگا۔
