اسلام آباد۔ 14جولائی (اے پی پی) وزیراعظم عمران خان پارینے کہ ودوک آ آبادی و تالان مروک آ شارتے مون آ تخسا ڈٹ بندی کننگ نا گرج ءِ، اسلام آباد کن پوسکن ءُ ماسٹر پلان اس جوڑ کننگے، بنجائی دارالحکومت مچ آ ملک اکن بایدے درور اس مرے، اسلام آباد اٹی کوزہ گیر آتون مون تننگ اہم ءُ چیلنج اسے۔ داخیال آتا درشانی ءِ او چارشنبے نادے آ بنجائی دارالحکومت اسلام آباد اٹی چندی شونداری ڈٹ آتا بنداو ءِ تخنگ نا دود آن تران کرسا کرے۔ وزیراعظم پارے کہ 1960آن 2010ء اسکان 50سال اٹی اسلام آباد شار اخس تالان مس، پین ہنداخہ 2010آن پد والا 10سال اٹی تالان مس ہرانا مطلب دادے کہ اسلام آباد شار بھاز ترندی اٹ تالان مننگ ءِ۔ اگہ نن وخت انا گرج آتا رداٹ بدلی کتون تو اسلام آباد اٹی ٹریفک تون اوار چندی وی آتون مون تروئی تمک۔ اسلام آباد اٹی سوزہ چٹنگ ءِ و شاری ہمپنگ نا اثرآک ترندی اٹ شارءِ تینا پلویڑاٹی ہلنگ ءُ۔ ننے داسی آن آخبت نا خواست آتے مون آ تخسا ڈٹ بندی کروئی مریک۔ وزیراعظم سی ڈی اے ءِ سڑک آتا تفنگ آ شاباشی تس و پارے کہ اسلام آباد اٹی ٹریفک نا ویل ترند مننگ والاءِ۔ پوسکن آ مسہ سڑک آتا تفنگ آن دا ویل ءِ ایسر کننگ اٹ کمک رسینگک۔ وزیراعظم پارے کہ تدوک آ 20سال اٹی شار اٹی درخت آتا کچ و سرسوز علاقہ ٹی ترندی اٹ کمتی مننگ ءِ۔ تعمیرات اٹی بھاز ودکی مسنے۔متکن آ ماسٹر پلان نا جاگہ غا پوسکن ءُ ماسٹر پلان اس جوڑ کننگ نا گرج ءِ۔ گرین ایریہ غاتے بچفنگ نا کوشست کننگے و غٹ خورک جاگہ و ہند آتیا شجرکاری کننگے۔ وزیراعظم پارے کہ اسلام آباد نا پہچان اونا دنگ، سوزہ و شادابی و زیباانگا موسم ءِ۔ اسلام آباد اٹی لندن کون انگا پِرمریک۔ اسلام آباد اٹی موسم برسات نا شجرکاری مچ آ ملک اکن بایدے درور اس مرے۔ وزیراعظم پارے کہ دبئی و دے ٹک نیامی کون آ ملک آتا نسبت اسلام آباد اٹی شجرکاری آسانی اٹ مننگ کیک۔ پوسکن آ ماسٹر پلان اٹی گرین ایریہ خورک جاگہ غاتیا شجرکاری، ٹریفک نا ویل ءِ ایسر کننگ و کوزہ گیر پڑک آتا برخلاف گام گیج آتیا خاص چکار کننگے۔ وزیراعظم پارے کہ پولیس اودے پارے کہ ہراتم او کوزہ گیر پڑک آتا برخلاف کارروائی کیرہ تو دوبہ دار آک ضمانت ہلسا پیشن مریرہ انتئے کہ اوفتے کانود نا خلیس اف۔ او پیسہ والاءُ و سزا ک ہنداخہ کم ءُ کہ او خلیپسہ۔ حکومت دا بابت پوسکن ءُ کانود اس اتسا بننگ ءِ۔ داویل اسلام آباد نا آخا بلکن مچ آ ملک اٹی ءِ۔ وزیراعظم پارے کہ پاکستان اٹ شاری ہمپنگ نا رجحان دنیا ٹی غٹ آن زیات ءِ۔ لاہور تدوک آ 20سال اٹی یک و نیم ہنداخہ پین تالان مسنے۔ بھلا شار تے ٹی کچٹی نا بھلو ویل اسے۔ یخ آتے ٹی لاہور اٹی کچٹی بے حد ودک۔ نن لاہور نا چاگڑد ءِ ساف کننگ و خشت آتا بھٹہ غاتے ٹی ٹیکنالوجی نا گدریفنگ کن کاریم کننگ اُن۔ وزیراعظم پارت کرے کہ موسم برسات اٹی پبی شجرکاری کننگے۔ پشاور و لاہور اٹی ہم ترندی اٹ تالانی مننگ ءِ۔ اوپارے کہ اسلام آباد اٹی پارک آتے بحال کننگ انگ ءِ۔ نیاڑی تیکن سیل و سوات نا وارخواہی تے ودفنگ انگ ءِ۔اوپارت کرے کہ ساڑی آ پارک آتا حالیت ءِ گچین کننگ تون اوار اوار پوسکن ءُ پارک ہم تفنگے۔ وزیراعظم پارے کہ ننا حکومت بس تو سی ڈی اے 4، 5ارب روپئی نا نسخان اٹی ئس اینو سی ڈی اے نا اکاؤنٹ اٹی 36ارب روپئی ساڑی ءِ۔ اوچیئرمین سی ڈی اے و اونا ٹیم انا گچین کارکڑد نا ستاءِ کرے۔
