اسلام آباد۔ 14جولائی (اے پی پی) وزیراعظم عمران خان صوبہ غاتیا زور شاغانے کہ اوار مروک آ علاقہ غاتا شونداری و شونہالی کن کروک آ قول آتا پوروی کن تینا بشخ ءِ شاغر۔ اوداخیال آتا درشانی ءِ چارشنبے نادے آ تینا کماشی ٹی اوار مروک آ علاقہ غاتا شونداری و شونہالی و خاص وڑاٹ داعمل کن بنجانا کنڈآن تروک آ فنڈ آتا بابت جاچ دیوان آن تران کرسا کرے۔ دیوان اٹی وزیر خزانہ شوکت ترین، وزیر ڈٹ بندی اسد عمر، وزیراعلیٰ خیبرپختونخوامحمودخان، خصوصی کمکار ڈاکٹر شہباز گل، خصوصی کمکار ڈاکٹر وقار مسعود، وزیرخزانہ خیبرپختونخواتیمور سلیم جھگڑا، سیکرٹری خزانہ و ایلوسینئر آفیسر آک ساڑی ئسر۔ دیوان اٹی اوار مروک آ علاقہ غاتے ٹی برجاشونداری سرجزآتا جاچ ءِ ہلنگا۔ دیوان ءِ پاننگاکہ اوار مروک آ علاقہ غاتا آبادی ملکی آبادی نا کم و ود 2.4درسد ءِ ہرانا اعتبار اٹ این ایف سی ایوارڈ اٹ اوار مروک علاقہ غاتا بشخ کم و ود 80ارب روپئی جوڑ مریک وخت اس کہ بنجاناکنڈآن داوخت آ 4درسد نا اعتبار اٹ زرتننگ انگ ءِ۔ دیوان ءِ پاننگاکہ اوار مننگ آن مست 84ارب ادا کننگاکہ وخت اس کہ اوار مننگ آن پد 146ارب زرتننگاکہ۔ دیوان ءِ پاننگاکہ مالی سال 2021-22نا بججٹ اٹی اوار مروک علاقہ غاتا مد اٹی صوبہ خیبرپختونخواکن کم و ود 130ارب روپئی نا بجٹ جتا کننگانے۔ دیوان ءِ پاننگاکہ اوار مروک علاقہ غاتا شونداری و شونہالی کن بنجانا کنڈآن مسکوہی قبائلی علاقہ غاتا الس تون کروک آ قول آتے پورو وڑٹ پورو کننگ انگ ءِ۔ وزیراعظم عمران خان پارے کہ اوار مروک علاقہ غاتا شونداری و شونہالی ساڑی حکومت نا اولیت ءِ۔ اوپارے کہ اوار مروک علاقہ غاتا الس ملک اکن بے پناہ قربانی تسنو، ہرافتا نن بے کچ قدر ءِ کینہ۔ وزیراعظم صوبہ غاتیا زور شاغاکہ اوار مروک علاقہ غاتا شونداری و شونہالی کن کروک آ قول آتا پوروی نا بابت صوبہ غاک تینا بشخ ءِ شاغر تانکہ شونداری وشونہالی نا عمل ءِ پین سوگو کننگ مرے۔
