اسلام آباد۔ 14جولائی (اے پی پی) صدر مملکت ڈاکٹر عارف علوی پارینے کہ پارلیمنٹ نا ڈیجیٹیلائزیشن کن آٹومیشن نا عمل جنوری 2023ء اسکان پورو کننگ نا گرج ءِ، پارلیمنٹ نا ڈیجیٹلائزیشن آن ہڑتوم آ ایوان تیٹی کانود جوڑ کننگ نا عمل اٹ گچینی بریک، داخیال آتا درشانی ءِ او چارشنبے نادے آ پارلیمنٹ ءِ سائبر لائخی تیان شپ کننگ نا ڈٹ انا بابت دیوان نا کماشی ءِ کرسا کرے۔ دیوان اٹی چیئرمین سینیٹ محمد صادق سنجرانی، اسپیکر قومی اسمبلی اسد قیصر، بنجائی وزیر انفارمیشن ٹیکنالوجی اینڈ ٹیلی کمیونیکیشن امین الحق، سیکرٹری انفارمیشن ٹیکنالوجی اینڈ ٹیلی کمیونیکیشن محمد سہیل راجپوت، سیکرٹری سینیٹ سیکرٹریٹ محمد قاسم صمد خان، سیکرٹری قومی اسمبلی سیکرٹریٹ طاہر حسین،م نیشنل انفارمیشن ٹیکنالوجی بورڈانا باسک آک و وزارت انفارمیشن ٹیکنالوجی نا آفیسر آتون اوار بڑزکو کمامدارآک ساڑی ئسر۔ صدر مملکت ڈاکٹر عارف علوی پارے کہ پوسکن آ ٹیکنالوجی پارلیمنٹ اٹ ڈٹ بندی، چاروکی و کنٹرول نا عمل ءِ پین گچین جوڑ کیک، پارلیمان نا باسک آتے آئی ٹی نا پوسکن انگا سوب آتیان ڈیٹا و فائل آتسکان آسان رسینگ دوئی مریک، وزارت انفارمیشن ٹیکنالوجی اینڈ ٹیلی کمیونیکیشن نا کنڈآن دیوان ءِ ڈٹ انا ساڑی حالیت و پیش رفت آ حوال تننگا، حوال اٹی پاننگاکہ ڈیپارٹمنٹل ڈویلپمنٹ ورکنگ پارٹی ڈٹ اکن چار سال اکن 1950ملین روپئی نا منظوری ءِ تسنے۔ اینخو سال ڈٹ اکن 120ملین روپئی جتا کننگانے۔ پروجیکٹ اسٹاف نا خذمت دوئی کننگ نا عمل نا بناءِ کننگانے ہراڑکن اخبارآتے ٹی اشتہار تننگا، وزارت انفارمیشن ٹیکنالوجی اینڈ ٹیلی کمیونیکیشن ڈٹ 2023اسکان پورو کننگ نا باوری کرفے۔ صدر مملکت ڈٹ آ وزارت انفارمیشن ٹیکنالوجی نا کارکڑد انا ستاءِ کرے و تینا پبی کمکاری نا باوری کرفے۔
