اسلام آباد۔ 14جولائی (اے پی پی) وزیرخارجہ مخدوم شاہ محمود قریشی شنگھائی کمکار تنظیم نا وزرائے خارجہ کونسل اٹی شریک ایلو وزیرخارجہ غاتون اوار چارشنبے نادے آ تاجکستان نا صدر امام علی رحمان تون اوڑدہی کرے۔ دفترخارجہ نا رداٹ وزیرخارجہ پارے کہ پاکستان و تاجکستان اٹ تاریخی برادرانہ تعلقداری ءِ، تاجکستان تون ہڑتوم آ کنڈآتا تعلقداری تے پین سوگو کننگ کن سنبرینگوک اُن۔ تاجکستان تون، تعلیم، ہاؤسنگ، انفراسٹرکچر، ٹیکنالوجی و توانائی نا بشخ آتے ٹی کمکاری ءِ مون آ دننگ کن سنبرینگوک اُن۔ شاہ محمود قریشی پارے کہ کاسا ڈٹ آتا وخت آ پوروی، توانائی راہداری نا جوڑ کننگ اٹ کمکار مریک۔ وزیرخارجہ نیامی ایشیائی جمہوریہ تون ریل، سڑک و توانائی نا ڈٹ آتیا عملدرآمد کن پاکستان نا است خواہی نا درشانی ءِ کرے۔ وزیرخارجہ مستی پارے کہ سی پیک دا چرجوئی ٹی اسہ بے مٹ ءُ موقع اس فراوان کیک۔ علاقائی سلامتی نا حالیت آتیا، وزیرخارجہ داہیت آ زور شاغاکہ اوغانستان آن جہانی فوج انا کشنگ آن پوسکن ءُ چیلنج و وارخواہی مون آ بسنے۔ اودااومیت نا درشانی ءِ کرے کہ شنگھائی کمکار تنظیم اوغانستان اٹی امن و مفاہمت نا عمل اٹ کمک کن پبی کڑد ادا کرسا کیک۔ وزیرخارجہ تاجک صدر ءِ اوغانستان اٹی امن کن پاکستان نا خیرخواہی کوشست آتیان معلومدار کرے۔ وزیرخارجہ تاجک صدر ءِ صدر پاکستان ڈاکٹر عارف علوی و وزیراعظم عمران خان و پاکستانی الس نا کنڈآن نیک است خواہی ناکلہو ءِ سرکرے۔
