اسلام آباد۔ 14جولائی (اے پی پی) بنجائی وزیر حوالکاری و شینکاری فواد حسین چوہدری پارینے کہ پی ٹی وی ءِ ایچ ڈی کننگانے، وزیراعظم ایچ ڈی ٹرانسمیشن نا بناءِ کیک، تدوک آ دور حکومت اٹ 1800بندغ ءِ ہڑدے ئی اجرت آ بھرتی کرسا آخبتی کننگا ہرانا سوب آن مچ آ ادارہ توس، داسہ نن دااِراسال اٹی ادارہ نا کارکڑد ءِ گچین کرینن دادے نن پورو وڑاٹ کٹیائی ءُ ادارہ اس جوڑ کینہ۔ چارشنبے نادے آ بڑزکو ایوان نا دیوان اٹی سینیٹر سیمی ایزدی، سینیٹر افنان اللہ خان و سینیٹر رخسانہ زبیری نا سوج آتا ورندی ٹی چوہدری فواد حسین پارے کہ 55کروڑ روپئی ہرا پی ٹی وی ءِ ملا اوٹی اسلام آباد سینٹر ءِ پورووڑاٹ ایچ ڈی کننگانے۔ پی ٹی وی پورو وڑاٹ ایچ ڈی مسنے، 4اگست آ وزیراعظم پی ٹی وی نا ایچ ڈی ٹرانسمیشن نا بناءِ کننگ ءِ، پی ٹی وی ٹی اسل ویل دادے کہ تدوک آ حکومت آتا دور اٹی 1800ملازم ڈیلی ویجز آ بھرتی کننگا ولدا اوفتے ریگولر کننگا، ننے دافتا 32کروڑ روپئی خڑچ تروئی تمک ہرانا سوب آن مچ آ ادارہ توسونے۔ داسہ نن دااِراسال اٹی ادارہ نا کارکڑد ءِ گچین کرینن، دادے نن پورو وڑاٹ کٹیائی ءُ ادارہ اس جوڑ کینہ۔ اومیت ءِ کہ اسہ سال اسکان نن پی ٹی وی نا ہرالیسن فیس ءِ ہلینہ اودے ہم ہلپنہ، نن اودے اونا نت تیا سلفنہ۔ اوپارے کہ پی ٹی وی نیوز ایچ ڈی مسنے، پی ٹی وی ہوم جزوی وڑاٹ پورو مسنے، پی ٹی وی سپورٹس ءِ پبلک پرائیویٹ پارٹنر شپ انا رداٹ بروک آ شش تُواٹی ایچ ڈی کننگک۔
