اسلام آباد۔ 14جولائی (اے پی پی) ایشیائی شونداری بینک انسٹی ٹیوٹ ٹوکیو نا کنڈآن کورونا نا دین و چندی ملک آتا راجی رکھ انا بارواٹ گام گیج آتیا جہانی دود اس اڈ ہلک۔ وزیراعظم نا خصوصی کمکار سینیٹر ڈاکٹر ثانیہ نشتر دود اٹی پاکستان نا نمائندگی ءِ کرے و صدارتی تران کرے۔ ایلو ترانکارآتے ٹی ایشیائی ملک آتا پالیسی ساز و نمائندہ غاک اوار ئسر ہرافک راجی رکھ انا گام گیج آتا آزموندہ غاتے مون آ تخار۔ تینا تران اٹی ڈاکٹر ثانیہ نشتر کورونا دین اٹی لاک ڈاؤن اٹی نیزگار خاہوت آتا دادرسی کن حکومت پاکستان نا کنڈآن جاری کروک احساس ایمرجنسی کیش پروگرام نا سوب، آزموندہ، اسبق و سرسہبی تیا گپ وتران کرے۔ اونا پاننگ ئس کہ احساس نا ڈیٹا و زرتس نا ڈیجیٹل نظام نا سوب آن احساس ایمرجنسی کیش انا وخت آ و شفاف فراوانی مس۔ دود اٹی حکومت پاکستان نا احساس نا راجی رکھ پروگرام ءِ جوان ستاکڑزنگ دوئی مس۔
