اسلام آباد۔ 14جولائی (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ پاک چین اقتصادی راہداری کون آ ڈٹ آن نئے تو ننا چکار اسہ کنڈ مسنے و نئے مریک، کس اسے دا بارواٹ غلط گمانی مف۔ حکومت، ایوان و مچ آ پاکستانی قوم لغوری جلہو نا مذمت ءِ کیک۔ چارشنبے نادے آ قومی اسمبلی ٹی مسلم لیگ (ن) نا احسن اقبال نا اعتراضی ٹک آ چست کروک آ ٹک آتا ورندی ءِ ترسا ڈاکٹر بابر اعوان پارے کہ اینو سہب اتون ہرا لغوری نا جلہو مسنے داایوان، حکومت و مچ آ پاکستان دانا ترندی اٹ مذمت ءِ کیک۔ پاک چین اقتصادی راہداری کون آ ڈٹ آن نئے تو ننا چکار اسہ کنڈ مسنے و نئے مریک۔ کس اسے دابارواٹ غلط گمانی مف۔ ڈاکٹر بابر اعوان پارے کہ او وزیر داخلہ تون ہیت کیک کہ او دابارواٹ و ملک انا جم سلامتی نا حالیت آتا بارواٹ ایوان ءِ پت اٹ ہلے۔ اوپارے کہ ہراتسکان پروٹوکول نا چٹفنگ نا بابت باندات نا تعلق ءِ تو داڑکن خطرہ نا جاچ انا کانود ساڑی ءِ۔ اوڑآنظرثانی ہم کننگک۔ وزیراعظم کابینہ ٹی ہم دا بابت پیدوار وڑاٹ ہیت کرینے کہ ہرافتے خطرہ ارے اوفتا بارواٹ تعلقدار ضابطہ غاتیا عمل کننگے۔ اوپارے کہ ہموفک ہم ساڑی ءُ ہرافتے تون بے تحاشہ سیکورٹی ءِ، اوفتے ٹی مسکوہی سرکاری ملازم ہم اوار ارے ہرافتے تون بلٹ پروف گاڈی مریک۔ گڑاس سرکاری ملازم ہندن مریرہ ہرافتے تون مسکوہی صدر و مسکوہی جج آتیان ہم زیات سیکورٹی مریک۔ دااسہ شوشااسے، دادے پروٹوکول تو پاننگ مریک ولے سیکورٹی پاننگ مفک۔ وزیراعظم داوڑنا تیان سیکورٹی ءِ پدی ہلنگ نا پارت کرینے۔ اوپارے کہ قومی سلامتی و خارجہ امور نا بارواٹ ریاست و حکومت نا موقف ہمودے ہرا تدوک آ دے تیٹی سیکورٹی حوال اٹی پیدوار کننگا۔ ڈاکٹر بابر اعوان پارے کہ غٹ ءِ معلوم ءِ کہ ہراتم وزیراعظم آن انٹرویوٹی سوج کننگاکہ انت پاکستان تینا اڈہ ءِ ایتک تو وزیراعظم پارے کہ نن امن اٹ تو شریدار مننگ کینہ ولے تنکی ٹی اسل شریدار مننگ کپنہ۔
