اسلام آباد۔ 14جولائی (اے پی پی) بنجائی وزیر کانود و انصاف بیرسٹر فروغ نسیم میراتی سرٹیفکیٹ آتا جاری کننگ ءِ اسہ اسٹیٹ آف دی آرٹ ڈٹ اس گوندسا پارینے کہ اونا دوررس اثرمرتب مریک، ہراتم نن داسسٹم ءِ جوڑ کرسا کانہ تو مخلوق ننے یات کیک۔ چارشنبے نادے آ پنجاب اٹی میراتی سرٹیفکیٹ آتا جاری کننگ نا دود آن تران کرسا اووزیراعظم عمران خان ءِ جوان انگا لوز آتے ٹی خراج تحسین پیش کرساپارے کہ داڈٹ انا کریڈٹ وزیراعظم ءِ کاہک۔ اوپارے کہ اسلام آباد اٹی اِرامسہ تو مست دا ڈٹ انا بناکننگا، 350نا خڑک درخواست بس و 317کانودی وارث آتے میراتی سرٹیفکیٹ جاری کننگا۔ اوپارے کہ دااسہ قابل عمل گام اسے۔ وکیل آک داڑآ بھاز شورکریر، پنجاب نا یانزدہ دُوانزدہ کروڑ نا آبادی ٹی دانااثربریک۔ بنجائی وزیر کانود وانصاف پارے کہ دااسہ اسٹیٹ آف دی آرٹ ڈٹ اسے، اینو کے پی ہم داکانود ءِ پاس کرینے۔ اوپارے کہ آخبت اٹ آن لائن ویری فیکیشن آن پد اُراٹی تولوک ہم میراتی سرٹیفکیٹ دوئی کننگ مریک۔ بنجائی وزیر کانود وانصاف بیرسٹر فروغ نسیم داگام آ وزیراعلیٰ پنجاب عثمان بزدار، وزیرداخلہ شیخ رشید احمد، وزیرکانود پنجاب راجہ بشارت و چیئرمین نادرا طارق ملک ءِ ہم خراج تحسین پیش کرے وپارے کہ اوفک گچین ءُ کاریم اس کرینو۔ اوپارے کہ میراتی سرٹیفکیٹ آتا جاری کننگ آن عدالت آتیا مقدمہ غاتا زور اٹی 25آن 30درسد کمتی مریک، پیشن نا ملک پاکستانی سفارت خانہ و مشنک نادراتون اواری اٹ دادے لانچ کرینو ہراڑآ وزیرخارجہ و سیکرٹری خارجہ مبارکباد نا حقدار ءُ۔
