اسلام آباد۔ 14جولائی (اے پی پی) پاکستان تحریک انصاف نا حکومت 40لکھ خاہوت ءِ نیزگاری آن کشنگ نا غٹ آن بھلوآسودہی ڈٹ اس تیارکرینے ہرانا رداٹ ”سرسہب پاکستان“ پروگرام 29نا جولائی آن باضابطہ وڑاٹ بناءِ کننگک۔ داہیت انا فیصلہ ءِ بنجائی وزیر خزانہ و محصولات شوکت فیاض ترین و وزیراعظم نا خصوصی کمکار عثمان ڈار نا نیام اٹ چارشنبے نادے آ اوڑدہی ٹی کننگا۔ وزیر مملکت حوالکاری فرخ حبیب ہم اوڑدہی ٹی ساڑی ئسک۔ وزارت خزانہ نا رداٹ دیوان اٹی فیصلہ کننگاکہ وزیراعظم عمران خان 29جولائی آ حکومت نا غٹ آن بھلا آسودہی ڈٹ انابناءِ کیک، مرکزی دود کنونشن سینٹر اسلام آباد اٹی مریک، دارداٹ عثمان ڈار ءِ تیاری تا ٹاسک ءِ تننگا۔ بنجائی وزیر خزانہ پارے کہ وزیراعظم السی آسودہی نا ڈٹ آتے ٹی ترندی اتنگ نا فیصلہ کرینے، ملکی کہول آ ”سرسہب پاکستان“ پروگرام 29جولائی آن لانچ مریک۔ اوپارے کہ سرسہب پاکستان حکومت نا آسودہی ایجنڈاغا تالان غٹ آن بھلا پروگرام مریک۔ ہاؤسنگ ڈٹ، اسکل ڈویلپمنٹ و آسان وام سرسہب پاکستان پروگرام نا بشخ اس مریک، ہیلتھ کارڈ و کشاری خذمت آک ہم سرسہب پاکستان پروگرام اٹی اوار مریرہ۔ شوکت ترین پارے کہ 40لکھ خاہوت ءِ نیزگاری آن کشنگ کن جامع پلان اس جوڑ کننگانے، پروگرام نا رداٹ ارب آ روپئی نا بجٹ اس جتا کننگانے۔ وزیراعظم نا خصوصی کمکار عثمان ڈار داوخت آ پارے کہ پروگرام نا رداٹ حکومت 5لکھ روپئی اسکان بیدس سود وام فراوان کیک۔ سرسہب بزغر پروگرام نا رداٹ بزغرآتے سود آن بیدس وام و کاروبار کن زرملک، حکومت ہر خاہوت آن 1بندغ ءِ تکنیکی تعلیم و تربیت فراوان کیک۔ ڈٹ انا کمک اٹ مچ آ ملک انا الس ءِ کم خڑچ اُراتا اسکیم اٹ اوار کننگک۔ عثمان ڈار پارے کہ چنکا و آسان وام تا کمک اٹ شیفکو تپہ نا کمک نا وڑوڈول اس ہم طے کننگانے۔
