اسلام آباد۔ 13جولائی (اے پی پی) بنجائی وزیر حوالکاری و شینکاری چوہدری فواد حسین پارینے کہ اوغانستان نا بدل مروک آ حالیت آتا پاکستان خوڑتی اٹ جاچ ئِ ہلنگ ئِ، ننا موقف بھاز پیدوار ئِ کہ نن اوغانستان اٹی امن نا خواہندار اُن ولے دا رداٹ جہانی برادری نا کمک درکارئِ، اوغان پڑک آتون ننا رابطہ ئِ و اوغانستان اٹی امن کن پاکستان نا کڑد ئِ مچ آ دنیا خننگ ئِ، جہانی برادری اوغان باہوٹ آتا ویل آ پاکستان تون تفے، ننا کوشست ئِ کہ اوغانستان اٹی ہمووڑنا حالیت ودی مف ہراڑآن اوغان باتی تے دُوارہ ہمپ و بٹ کروئی تمے۔ بنجائی کابینہ تحریک لبیک پاکستان (ٹی ایل پی) آ پابندی نا بابت کمیٹی نا رپورٹ ئِ مون آ تخسا تنظیم آ پابندی نا فیصلہ ئِ برقرار تخا، بھلا عئید انا وخت آ سعودی عرب آن 85پاکستانی بندی تے یلہ کننگ انگ ئِ، گچین کاری اصلاحات نا بابت اپوزیشن تون بھازانگا ٹک آتیا امنائی سلاہ مسنے، تدوک آ دے پنچ لکھ 25ہزار کوویڈ نا ڈوزز خلنگا، داتم اسکان 2کروڑ پاکستانی تا ویکسی نیشن مسنے، الس آن خواست ئِ کہ کورونا ایس او پی تیا سختی اٹ عمل کیر، بنجائی کابینہ بھلا عئید آ مسہ چھٹی تا منظوری و پاک فوج اکن جاری بنداوی تنخواہ نا 15درسد اسپیشل الاﺅنس 2021ءتننگ نا منظوری ئِ تس۔ سے شنبے نادے آ داڑے وزیراعظم عمران خان نا کماشی ٹی بنجائی کابینہ نا دیوان آن پد میڈیا ئِ حوال ترسا بنجائی وزیر حوالکاری پارے کہ بنجائی کابینہ نا دیوان نا بناءٹی یوم شہداءکشمیرنا درجہ غاتا بڑزی کن فاتیا کننگا۔ 13جولائی 1931ءآ 21کشمیری تے داہیت آ شہید کننگاسس کہ او حق گوئی و بے باکی کن بش مسر۔ اینو بنجائی کابینہ و قوم ہمو کشمیری ورناتے سلام پیش کیک۔ اوپارے کہ بنجائی کابینہ نا دیوان اٹی الیکٹرانک وونٹنگ مشین و آئی وونٹنگ نا بابت داتم اسکان نا پیش رفت آ حوال تننگا۔ اوپارے کہ الیکٹورل ریفارمز نا بابت حالیت آک گچین مننگ ئُ۔ اپوزیشن تون بھاز انگا گڑاتیا امنائی مسنے، ہرافتیا امنائی اف نن کوشست کننگ اُن اوفتیا ہم اتفاق مرے۔ ای وی ایم مشین اٹ ننا مسخت گچین کاری تے شفاف کننگ ئِ۔ اوپارے کہ وزیراعظم عمران خان نا کوشست آتا نتیجہ ٹی بھلاعئید انا وخت آ سعودی حکومت نا کنڈآن پین 85بندی تے یلہ کننگ انگ ئِ۔ دابندی تے پدی اتنگ کن خاص ئُ جہاز اس گدریفنگ انگ ئِ۔ بنجائی وزیر حوالکاری پارے کہ سعودی ولی عہد محمد بن سلمان دورہ پاکستان اٹی پڑو کریسس کہ نن دا بندی تے یلہ کینہ۔ اوپارے کہ بندی تا یلہ کننگ نا عمل پدریسہ چلینگ انگ ئِ۔ اوپارے کہ مچ آ دنیاغان سد آ بندی یلہ مسر۔ پیشن نا ملک ہرا لیبر تپہ زندان تیٹی ئُ اوفتے کن دابھلو مستائی اسے۔ ہرابندیک بھلا ڈوہ تیٹی اوار افس اوفتے پدی اتنگ نا کاریم بھاز ترندی اٹ برجائِ۔ اومیت ئِ کہ زیات تر پاکستانی زوت پاکستان آ پدی بریرہ۔ بنجائی وزیر حوالکاری پارے کہ خصوصی کمکارجان جوڑی ڈاکٹر فیصل کوویڈ نا تالانی و ویکسی نیشن نا حالیت آتیا کابینہ ئِ حوال تس۔ کابینہ ئِ پاننگاکہ تدوک آ دے پنچ لکھ 25ہزار کوویڈ نا ڈوز خلنگا و داتم اسکان اِرا کروڑ بندغ ئِ کورونا ویکسین خلنگانے۔ پگہ دابابت این سی او سی اسہ رپورٹ اس ہم ایتک۔ اوپارے کہ کراچی و خیبرپختونخواٹی کوویڈنا کیس آک ودانو، پنجاب اٹی حالیت آک کنٹرول اٹی ئُ، داالمی ئِ کہ رکھی گام گیج آتے کاریم اٹ اتنگے۔ اوپارے کہ بنجائی کابینہ 20آن 22 جولائی اسکان مسہ دے بھلا عئید انا چھٹی تا منظوری ئِ تسنے۔ اوپارے کہ کابینہ ئِ اہم شخصیت بشمول وزیر آک، وزیر مملکت آک و گچین مروک آ نمائندہ غاک، جج صاحب آک، سرکاری ملازم و ایلو بندغ آتا سیکورٹی و اوفتا کاریم اٹ اتوک آ پروٹوکول نا حالیت آتے پیش کننگا۔ کابینہ غان کیہی زیات پروٹوکول اپوزیشن ومسکوہی بیوروکریٹس آتون ئِ۔ دافیصلہ کننگانے کہ بروک آ ہفتہ اسہ جامع رپورٹ اس وزیراعظم ئِ پیش کننگک۔ وزیراعظم پارت کرے کہ بروک آ کابینہ دیوان اٹی سیکورٹی و پروٹوکول ئِ ریشنلائز کننگ نا بابت جامع پلان اس پیش کننگے۔ چوہدری فواد حسین پارے کہ بشام شجرکاری نا بابت حکومت ساڑی آ بشام شجرکاری ٹی ملکی تاریخ نا غٹ آن بھلا مہم نا بنائِ کیک۔ دابابت غٹ صوبہ غاتے ٹی پبی شجرکاری مہم اس چلیفنگک۔ وزیراعظم غٹ وزیر، ایم این اے و ایم پی اے تے شجرکاری مہم اٹی پبی بشخ ہلنگ نا پارت کرینے۔ اوپارے کہ بلاول بھٹو الیکشن مہم آن مایوس مرسا امریکہ غا روانہ مسنے، اونا اومیتدار آک ہی پورو افس۔ اسہ پین سوج اسے آ بنجائی وزیر حوالکاری پارے کہ اوغانستان نا بابت پاکستان نا موقف بھاز پیدوار ئِ ، نن امن نا ہیت ئِ کننگ اُن، غٹ اوغان پڑک آتون ننا رابطہ ئِ۔ اوپارے کہ خرینی ودی کننگ آسان و اوفتے ایسر کننگ مشکل مریک، پاکستان نا کڑد ئِ مچ آ دنیا خننگ ئِ۔ نن امن کن سلوک اُن۔ اسہ سوج اسے آ اوپارے کہ داوخت آ سعودی عرب آن بندیک یلہ مرسا وطن آ پدی بننگ ئُ، امریکہ تون ننا دُن ئُ ہچ ئُ انتظام اس متنے۔
