اسلام آباد۔ 13جولائی (اے پی پی) صدر مملکت ڈاکٹر عارف علوی پارینے کہ فصل آتا پیدوار ءِ ودفسا غذائی رکھ ءِ پک کننگ تون اوار اوار کبینی نا مون ءِ توننگ مریک، امب انا ویلیوایڈیشن و پوسکن آ منڈی تے پٹسا بھلو زرمبادلہ اس کٹیاکننگ مریک، چندی گام گیج آتیان پاکستانی امب ءِ مچ آ دنیاٹی درستی راستی کرفنگ مریک، الس آن خواست ءِ کہ عئید انا وخت آ کورونا ایس او پی تیا عملدرآمد ءِ پک کیر۔ داخیال آتا درشانیءِ او سے شنبے نادے آ ایوان صدر اٹی مینگو فیسٹیول نا بنائی دود آن تران کرساکرے۔ صدر مملکت ڈاکٹر عارف علوی پارے کہ پاکستان اٹی دنیا نا گچین نہری نظام ساڑی ءِ۔ ملکی کشت وکشار ءِ گچین کننگ کن کوشست آتا گرج ءِ۔ اوپارے کہ کرپاس آ جوجک آتا جلہو ءِ تورسا پیدوار ءِ ودفنگ مریک۔ دنیاٹی داوخت آ فصل آتا اِراہنداخہ و مسہ ہنداخہ پین پیدوار دوئی کننگ انگ ءِ۔ نن دنیانا آزموندہ غاتیان فائدہ ہرفسا تینا فصل آتا پیدوار ءِ بایدے ودفن۔ اوپارے کہ مستین اٹ پنجاب نا بزغرآک امریکی کشت وکشار نا شونداری ٹی اہم کڑد ادا کریر۔ اوپارے کہ کنوئی آ گڑاتا نہاد آتے سوگو تخنگ اہم ءِ۔ ملکی پیدوار ءِ ودفسا کبینی ءِ چٹفنگ مریک۔ اوپارے کہ مینگو فیسٹول اٹ ملتان، حیدرآباد، سکھر، جھنگ، شکارپور، خیرپور و اسلام آباد نا چیمبرز آف کامرس اینڈ انڈسٹریز شریک ءُ۔ اوپارے کہ پاکستانی امب انا چس مچ آدنیاٹی پنیءِ۔ پیشن نا ملک آتے ٹی پاکستانی امب انا گمراٹ ذکر ءِ کننگک و سنگت آتے ٹیکی نا وڑاٹ پیش کننگک۔
