اسلام آباد۔ 13جولائی (اے پی پی) وزیرخارجہ مخدوم شاہ محمود قریشی پارینے کہ روس، چین و نیامی ایشیانا ملک آک ڈیہہ نا اہم ءُ ملک ءُ، اوغانستان نا بابت دااہم ملک آتون سلابت آن پد امنائی حکمت عملی اس کینہ۔ سے شنبے نادے آ تاجکستان اٹی اڈ ہلوک آ شنگھائی کمکار تنظیم نا وزرائے خارجہ کونسل نا دیوان و اوغانستان نا بدل مروک آ حالیت آتا بابت اسہ بیان اسے ٹی وزیر خارجہ پارے کہ ای داوخت آ شنگھائی کمکار تنظیم نا وزرائے خارجہ کونسل نا دیوان اٹی بشخ ہلنگ کن تاجکستان اٹی ساڑی اُٹ۔ تاجکستان نا وزیرخارجہ تون اوغانستان نا حالیت آتیا کنا سرجم گپ وتران مس۔ اینو(سے شنبے نادے) آ کنا ازبکستان، قزاخستان، اوغانستان، روس و چین انا وزیر خارجہ غاتون ہم اوڑدہی نا گمان ارے۔ وزیرخارجہ پارے کہ داغٹ ڈیہہ نا اہم ءُ ملک ءُ و اوغانستان نا حالیت آتیا نظرہم تخانو، نن خوانہ کہ دااہم ملک آتون سلابت آن پد امنائی حکمت عملی اس جوڑ کننگے۔ وزیرخارجہ پارے کہ پاکستان تینا زمواری تے جوان وڑاٹ پورو کننگ ءِ۔ خوانخواستہ اوغانستان نا حالیت آک خراب مریرہ تو غٹ زہمی مریرہ۔ داسلابتی عمل ءِ مون آ دننگ نا جوان ءُ موقع اسے۔ اوپارے کہ پاکستان اسٹ انگا ملک ءِ ہراکیہی دہائی آن سی لکھ اوغان باہوٹ آتا خذمت ءِ کننگ ءِ۔ داسہ اگہ خدانخواستہ حالیت خراب مریک تو نن پین اوغان باہوٹ آتے تخنگ ءِ سگنگ کپنہ۔ اوپارے کہ اوغان باہوٹ آتا آڑاٹ ہموفک ہم پترینگ انگ کیرہ ہرافک ننے نسخان ایتر۔ وزیرخارجہ پارے کہ باہوٹ آتا آڑاٹ پاکستان نا دشمنک پترینگ انگ کیرہ، نن انسانی ہمدردی نا رداٹ اوفتا کمکاری ءِ کننگ خوانہ، ولے تینا کودک مخلوق نا رکھ ءِ ہم ننے پک کروئی ءِ۔ وزیرخارجہ پارے کہ پاکستان خواہک اوغانستان اٹی امن و سوگوی مرے، ننے آ ہراتم اسکان ہورہرفسا کرساکننگک، ای اوفتے ہندا پاوہ کہ مستین نا غلطی تے دُوارہ کپس، و اواری اٹ تولسا کسر اس کشر۔ وزیر خارجہ پارے کہ اوغانستان نا اہم شخصیت آتے ہیت وگپ نا سلہ خلینہ۔ اوغان سرکڑدہ غاک تولر و پار نن امر اوفتا کمک ءِ کننگ کینہ۔ وزیرخارجہ پارے کہ بھارت اوغانستان اٹی سپائلر نا کڑد ءِ ادا کرے و ڈیہہ نا امن اٹ اڑنگ شاغنگ ءِ، جہانی برادری ءِ مرے کہ او بھارت ءِ منفی رویہ غان منع کے وخت اس کہ بھارت اوغانستان ءِ امن اٹ رہینگ انگ کن ہلے۔
