اسلام آباد۔ 13جولائی (اے پی پی) پاکستان اقوام متحدہ نا سلامتی کونسل نا قرارداد آتا رداٹ حق خودارادیت نا رواحق انا دوئی کننگ اسکان بھارتی ظلم انا برخلاف جہد اٹی تینا کشمیری ایڑھ ایلم تا مخ تفی ءِ برجاتخنگ نا درشانی ءِ کرینے۔ سے شنبے نادے آ یوم شہدائے کشمیرنا وخت آ دفترخارجہ نا ترجمان زاہد حفیظ چودھری پارے کہ پاکستان نا حکومت و الس بھارت نا غیر کانودی کوزہ گیری ٹی جموں و کشمیرنا ہمو22مارتے خراج عقیدت پیش کیرہ ہرافک 1931ء ٹی سری نگراٹی ظالمانہ ڈوگرہ فوج انا مقابلہ ءِ کرسا تینا جون تے ندر کریر۔ ترجمان پارے کہ ہموشہید آتا ہمت 1931اٹی حق خودارادیت کن بے مٹ جہد کریر ہرااینو اسکان برجاءِ۔ اوپارے کہ 5اگست 2019آن پد داتم اسکان مقبوضہ جموں و کشمیر اٹی بھارتی کوزہ گیر فورس آک 390آن زیات کشمیری تے شہید کرینو۔ترجمان پارے کہ تدوک آ ہفت دہائی ٹی بھارتی جور، کشمیری الس نا حوصلہ غاتے پرغنگ اٹ بے سہب مسنے۔ ترجمان اسہ وار ولدا جہانی برادری خاص کر اقوام متحدہ و انسانی حق انا تنظیم تیان خواست کرے کہ او بھارتی کوزہ گیر فورس آتا کنڈآن کشمیری تا پدریسہ عدالت آن ایڑتر خون نا جاست وپاست ءِ کیر و ادا ڈوہ انا مرتکب بندغ آتے اوفتے اوفتا کروک نا سزاترفر۔
