اسلام آباد۔ 13جولائی (اے پی پی) وزیر مملکت حوالکاری وشینکاری فرخ حبیب پارینے کہ الیکشن کمیشن اٹی فارن فنڈنگ کیس اٹ ن لیگ و مسلم لیگ ن نا اکاؤنٹ آتا فنانشل ایکسپرٹس و چارٹر اکاؤنٹنڈ نا کمک اٹ جانچ پڑتال نا پوسکن ءُ درخواست اس دائر کرینے۔ اسٹیٹ بینک آف پاکستان نا کنڈآن جمع کرفوک آ ریکارڈ نا رداٹ ن لیگ نا 12و پیپلزپارٹی نا 7اکاؤنٹ آتا گوشوارہ غاتے ٹی ذکر اف،دُن اف کہ دااکاؤنٹ آتے منی لانڈرنگ، فالودہ والا و پاپڑ والا اکاؤنٹ آتیانبار کمیشن و منی لانڈرنگ کن کاریم اٹ تو اتنگ تنو۔ بے نظیر بھٹو تینا کتاب اٹی نوشتہ کرے کہ کنا حکومت ءِ بِٹنگ کن نواز شریف اسامہ بن لادن آن پیسہ ہلکونے، پیپلزپارٹی مارک سہگل ءِ ہرامداٹ زرترساکرے۔ یوم شہداکشمیر آ جون تے ندر کروک آ کشمیری تے سلام پیش کینہ۔ مودی ءِ خوش کننگ کن تینا برام تیا بٹنگوک آک وخت اس اوڑآن سوج کریر کہ او مظلوم کشمیری تیا انت اکن ظلم کننگ ءِ، گڑاس بہروپیہ کشمیرنا دورہ غاٹی ءُ ہرافتا کشمیرکاز اتون اوفتا ہچ ءُ تعلق اس اف، او اسل اٹ کشمیر کاز ءِ نسخان تننگ ءُ، اکبرایس بابر ایزی نا بروک آ قسط اکن من گھڑت فائنڈنگ رپورٹ نا شوشاءِ ہلنگ ءِ۔ او سے شنبے نادے آ الیکشن کمیشن اٹ مسلم لیگ ن و پیپلزپارٹی نا فارن فنڈنگ نا بابت تینا درخواست نا سماعت آن پد میڈیا تون گپ وتران کریکہ۔ وزیر مملکت حوالکاری و شینکاری فرخ حبیب پارے کہ مسلم لیگ ن و پیپلزپارٹی نا فارن فنڈنگ نا بابت سکروٹنی کمیٹی ٹی ننا درخواست زیرسماعت ءِ، نن اسہ پوسکن ءُ درخواست اس دائرکرینن ہراٹی مسلم لیگ ن و پیپلزپارٹی نا کنڈآن فارن فنڈنگ نا بابت جمع کرفوک آ ریکارڈ اسکان رسینگ خاص وڑاٹ چارٹرڈ اکاؤنٹ و فنانشل ایکسپرٹس آن جانچ پڑتال نا خواست کننگانے انتئے کہ الیکشن کمیشن داآسراتی ءِ پی ٹی آئی نا فارن فنڈنگ کیس اٹی ہم تسنے، ہنداآسراتی ءِ نن ہم خواہسونن، دانا مست آن درور ساڑی ءِ۔ اوپارے کہ ننا کیس 2017ء آن الیکشن کمیشن تون چلینگ انگ ءِ، ولے ن لیگ و پیپلزپارٹی تینا اکاؤنٹ آتا ریکارڈ ءِ جمع کرفپننگ ءُ، اسٹیٹ بینک انا کنڈآن ہراریکارڈ ءِ جمع کرفنگانے ہراٹی ہڑتوم آ جماعت آتا 19اکاؤنٹس ہندن ءُ ہراداپارٹی تا گوشوارہ غاتے ٹی پاش کننگتنو۔ اوپارے کہ داہڑتوم آ پارٹیک داآئینی ادارہ نا مون آ ورندی تننگ، ریکارڈ جمع کرفنگ نا جاگہ غا نرنگ نا کسر ءِ اختیار کرینو، ولے پی ٹی آئی تہیہ کرینے کہ داکیس ءِ ایسر اسکان سرکننگک۔ اوپارے کہ حنیف عباسی نا کیس اٹی سپریم کورٹ فیصلہ تسنے کہ الیکشن کمیشن آف پاکستان غٹ سیاسی جماعت آتا اکاؤنٹ آتا جانچ پڑتال ءِ کے۔ اوپارے کہ پی ٹی آئی نا برخلاف فارن فنڈنگ کیس اٹ 60ہزار عطیہ کروک آ بندغ آتا ریکارڈ ءِ پیش کرینے۔ اوپارے کہ ن لیگ و پی پی والاک تینا پارٹی اکاؤنٹ آتے ہم منی لانڈرنگ، کرپشن و جعلی اکاؤنٹ آتے کن کاریم اٹ اتنگ ءُ، بے نظیر بھٹو تینا کتاب اٹی نوشتہ کرینے کہ نواز شریف کنا حکومت ءِ بِٹنگ کن اسامہ بن لادن آن پیسہ ہلکونے، داسمااف کہ ہراہراکان دِناپن آ پیسہ ہلسا کرینو۔ اوپارے کہ اینو 13جولائی ءِ، 1931ء ٹی اینونادے ڈوگراہ راج انا مون آ کودک کشمیری سوگوءُ دیوال اس جوڑ مسراوفتا قربانی تے سلام پیش کینہ۔
