اسلام آباد۔ 12جولائی (اے پی پی) وزیراعظم عمران خان پارینے کہ مچ آ ملک اٹی مزار آک ننا تاریخی میرات ءُ، دربارآتا چارمہ کنڈ واقع ڈغارتے جوان وڑاٹ کاریم اٹ اتنگ کن جامع پلان اس ٹہیفنگے۔ داخیال آتا درشانی ءِ او دوشنبے نادے آ تینا کماشی ٹی حضرت داتا گنج بخش انا مزار نا جامع ڈویلپمنٹ و مینجمنٹ ڈٹ، لاہور نا تاریخی بادشاہی مسیت و پنجاب اٹی ایلو مزار آتا رکھ و بحالی و بیرفنگ نا بابت دیوان آن تران کرسا کرے۔ وزیراعلیٰ پنجاب سردار عثمان بزدار، صوبائی وزیر اوقاف پیر سید سعید الحسن، صوبائی وزیر خزانہ ہاشم جوان بخت، خصوصی کمکار وزیر اعلیٰ ڈاکٹر فردوس عاشق اعوان، چیف سیکرٹری پنجاب و ایلو سینئر کمامدارآک ویڈیو لنک انا کمک اٹ دیوان اٹی بشخ ہلکر۔ وزیر مملکت حوالکاری فرخ حبیب ہم دیوان اٹی ساڑی ئسک۔ وزیراعظم ءِ لاہور نا تاریخی و مذہبی ہند حضرت داتا گنج بخش علی ہجویری نا مزار و بادشاہی مسیت نا رکھ و بحالی و آرائش نا بابت ڈٹ انا بابت سرجم وڑاٹ حوال تننگا۔ داتا دربارنا بابت پاننگاکہ دا ڈٹ اٹی دربار اٹی زائر آتا آسراتی، دربارنا چارمہ کنڈاٹی انفراسٹرکچر نا گچینی، و زائرآتے گچین آسراتی تا فراوانی اتون اوار اوار داہند ءِ مذہبی سیل و سوات نا مرکز اس جوڑ کننگ و دینی تعلیم نا مرکز اس جوڑ کننگ نا بابت ڈٹ اس ٹہیفنگانے۔ داڈٹ انا رداٹ دربار داتا گنج بخش ءِ اسہ ویلفیئر مرکز اسے نا وڑاٹ کننگک، ہراڑے حقدار زائرآتے کُن و خور، ہنکین نا آسراتی تون اوار اوار اوفتا تعلیم نا بست وبند اتون اوار اوار دربارنا گچین بست وبند ءِ ہم پک کننگک تانکہ زائر آتا پارکنگ، لنگرو ایلو آسراتی تے گچین کننگ مرے۔ بادشاہی مسیت نا رکھ و آرائش نا بابت پاننگاکہ داڈٹ اٹی تبرک گیلری، قرآن ہال، صحن نا گچینی و نمازی تیکن آسراتی تے گچین کننگک۔ وزیراعظم عمران خان ءِ پنجاب اٹی ایلو مزار آتا بحالی و رکھ انا بابت ہم حوال تننگا۔ دیوان آن تران کرسا وزیراعظم عمران خان پارے کہ مچ آ ملک اٹی واقع مزار آک ننا تاریخی میرات ءُ۔ اوپارے کہ مذہبی سیل وسوات نا مون آ دننگ نا بابت داہند آتا بحالی و رکھ بھازاہم ءِ۔ وزیراعظم پارے کہ دربارآتا چارمہ کنڈاٹی واقع ڈغارتے جوان وڑاٹ کاریم اٹ اتنگ نا بابت جامع پلان اس ٹہیفنگے تانکہ داسرکاری ڈغارتے ہسپتال و تعلیمی ادارہ غاتے کن کاریم اٹ اتنگ مرے۔
