اسلام آباد۔ 12جولائی (اے پی پی) وزیرداخلہ شیخ رشیداحمد پارینے کہ آزاد کشمیراٹی ساف و بے کنڈہلوک گچین کاری تا اڈتننگ کن الیکشن کمیشن نا درخواست آ وزارت داخلہ ایف سی، رینجرز تون اوار سول آرمڈ فورس انا 7ہزار آن زیات ورنا گدریفنگ ءِ، آزاد کشمیر نا گچین کاری تیٹی تحریک انصاف سرسہبی دوئی کیک و حکومت جوڑ کیک۔ اپوزیشن مہالو آن شورکننگ نا بناءِ کرینے، مسکوہی فاٹا نا علاقہ غاتے ٹی تھری جی، فورجی ءِ ملنگ والا اُن، این سی او سی نا پارت آ راولپنڈی اسلام آباد نا علاقہ غاتے ٹی سمارٹ لاک ڈاؤن کننگ انگ ءِ۔ دوشنبے نادے آ داڑے وزارت داخلہ ٹی پریس کانفرنس آن تران کرسا شیخ رشید احمد پارے کہ مریم نواز و بلاول دھاندلی نا شور انا شاغنگ نا بناءِ کرینو۔ کشمیر اٹی اللہ نا حکم اٹ پذیرائی عمران خان نامریک و 25جولائی آ آزاد کشمیرنا گچین کاری تیٹی تحریک انصاف سرسہب مریک۔ اوپارے کہ کشمیراٹی پی ٹی آئی نا حکومت نا قیام ڈیہہ نا گرج ءِ۔ وزیراعظم عمران خان ہی اقوام متحدہ نا قراردادآتا رداٹ کشمیرنا ویل ءِ ایسر کرفک۔ اوپارے کہ آزاد کشمیر اٹی شفاف گچی کاری کن ضرورت تمنگ آ سول آرمڈ فورس آتون پاک فوج ہم فرض سرانجام ایتک۔ اوپارے کہ ایف آئی اے کیہی کیہی سال آن تعینات آفیسر آتے بدل کننگانے۔ نادرا کراچی ٹی جعلی شناختی کارڈ جوڑ کننگ اٹ اوار 39ملازم آتے اینک کننگانے۔ ملک اناایلو علاقہ غاتے ٹی ہم نادرانا دفترآتے ٹی اواری اٹ جعلی شناختی کارڈ جوڑ کروک آتا برخلاف کارروائی نا پارت کننگانے۔ وزیرداخلہ پڑو کرے کہ مسکوہی فاٹا نا علاقہ غاتے ٹی تھری جی و فورجی سروس ءِ ملنگ والا اُن ہراڑے گرج مریک شارٹ نوٹس آ داسروس ءِ بند ہم کننگ مریک۔ اوپارے کہ اسلام آباد راولپنڈی ٹی کورونا نا کیس آک ودنگ ءُ ہرانا سوب آن گڑاس زہمی علاقہ غاتے ٹی سمارٹ لاک ڈاؤن خلنگ انگ ءِ۔ اووزارت داخلہ نا ماتحت ادارہ غاتے پارت کرے کہ میڈیا بشمول سوشل میڈیا کن تینا ترجمان پن کیر تانکہ الس اسکان مستند و سہی معلومداری سرمننگ کے۔ وزیر داخلہ پارے کہ ہرافتا رپورٹ نیگیٹیو بسنے اوفتے طورخم بارڈرآ داخلہ نا موکل تسونن ہرافتا کیس پازیٹو ءِ اوفتے ضلعی انتظامیہ قرنطینہ ٹی تخک۔ وزیر داخلہ پارے کہ تحریک لبیک پاکستان نا بابت فیصلہ ءِ پگہ کابینہ کیک۔ کمیٹی سمریءِ کابینہ غا گدریفینے۔ اسہ سوج اسے نا ورندی ٹی اوپارے کہ پارلیمنٹ ہاؤس نا مون آ سلہہ بند بندغ نا پشٹول اٹی سم الوکہ۔ پولیس دوبہ دار ءِ دزگیرکرسا پشٹول ءِ دوئی کرینے۔ واقعہ نا جاست وپاست ءِ کننگ انگ ءِ۔ اسہ سوج اسے نا ورندی ٹی وزیرداخلہ پارے کہ مریم نواز 14اگست آیوم آزادی نا وخت آ دھرنا تننگ نا خواہش اٹ سکنگ ءِ۔ اودے دھرنا تروئی ءِ تو ایتے ولے معلوم مسنے کہ او سندھ آ ہِننگ ءِ۔ اپوزیشن آزاد کشمیرنا گچین کاری تیٹی شکست آن دوچارمریک و پی ٹی آئی سرسہب مریک۔ اسہ سوج اسے نا ورندی ٹی اوپارے کہ بھارت مدام پاکستان ءِ نسخان تننگ نا بے سہب کوشست کرے۔ فیٹف اٹی ہم اوپاکستان نا برخلاف سازش کرساکرینے۔ پاکستان اٹ بے چیٹی تالان کروک آک ہلنگانو۔ بھارت نا ہر سازش ءِ ننا ادارہ غاک بے سہب کرینو۔ آخبت ہم بے سہب کیرہ۔ وزیرداخلہ پارے کہ وزارت داخلہ نا کاریم سیم انا انتظام ءِ چلیفنگ ءِ، آخبت نا خواست آتون ہم گرنچ نظام بارڈر کراسنگ پوائنٹ آتیا خلینہ۔ اسہ سوج اسے نا ورندی ٹی وزیرداخلہ پارے کہ پاک فوج آن آزاد کشمیرنا گچین کاری تیٹی پولنگ اسٹیشن تا پیشن کمک نا خواست کننگ مریک۔ اوپارے کہ پاکستان نا حکومت دنیا نا ایلو ملک آتا مقابلہ ٹی کورونانا حالیت آتون گچین وڑاٹ مون تننگ اٹ سرسہب مسنے۔ این سی او سی گچین ءُ کاریم کرینے۔ اسہ سوج اسے نا ورندی ٹی اوپارے کہ شہباز شریف تون اوار اسہ راہشون اسے نا کنڈآن ہم ای سی ایل آن پن ءِ کشفنگ نا درخواست دوئی متنے۔ وزیرداخلہ پارے کہ پاکستان و اوغانستان ہڑتوم آک وتواجہ ملک ءُ۔ خارجہ امور نا بابت وزارت خارجہ ہی بیان جاری کننگ نا مجاز ءِ۔ وزارت داخلہ تون تعلقدار غٹ باندات آتیا سخت نظرءِ۔ اوپارے کہ ہمو 70اوغان شاری ہرافتا اوغانستان اٹی درمان ممکن اف ءِ پاکستان اٹ درمان نا موکل تننگانے۔ اسہ سوج اسے نا ورندی ٹی وزیرداخلہ پارے کہ عئید انا سرکاری چھٹی تا وزارت داخلہ سمری ءِ گدریفینے۔ 20تاریخ آن چھٹی تا سلاہ ءِ تننگانے۔
