اسلام آباد۔ 12جولائی (اے پی پی) بنجائی وزیر تعلیم، کسبی تربیت و قومی دودوربیدگی میرات شفقت محمود تون بلغاریہ نا پاکستان اٹی پوسکن تعینات سفیر ارینا گانشیوااوڑدہی کرے۔ ہراٹی تعلیم و دودوربیدگ نا پڑاٹ ہڑتوم آ ریاست آتا نیام اٹ کمکاری نا گرج ءِ پین ودفنگ آ زور شاغنگا۔ بنجائی وزیر پارے کہ ننا تعلقداری مدام پت، تین پہ تینی مفاہمت و خڑکی کمکاری نا پیدواری ءِ کرسا کرینے و پاکستان بلغاریہ تون تینا تعلقداری تے زیات اہمیت ایتک و تین پہ تینی فائدہ غاتا غٹ بشخ آتے ٹی داتعلقداری تے پین ودفنگ خواہک۔ اوڑدہی ٹی بلغاریہ نا سفیر ارینا گانشیواپارے کہ تعلیم و دودوربیدگ تون اوار چندی بشخ آتے ٹی تین پہ تینی کمکاری نا بھاز گنجائشت ارے۔ اوہڑتوم آ ملک آتا نیام اٹ مخلوق تون رابطہ و دودوربیدگی تبادلہ ءِ ودفنگ و مون آ دننگ اٹ بھاز است خواہی نا ہم درشانی ءِ کرے۔ محی الدین احمد وانی، ایڈیشنل سیکرٹری، وزارت تعلیم و قومی میرات و دودوربیدگ ڈویژن نا عہدیدارآک ہم دیوان اٹی ساڑی ئسر۔
