اسلام آباد۔ 12جولائی (اے پی پی) وزیر مملکت حوالکاری وشینکاری فرخ حبیب پارینے کہ مریم صفدر و اونا باوہ نواز شریف و مودی نا بیانیہ ٹی ہچ ءُ پرخ اس اف، نواز شریف نا بھارت نواز بیانیہ ءِ ملک انا تہہ ٹی مریم مون آ دننگ ءِ۔ ادارہ و اوفتا سروک آتے شست کننگ انگ ءِ، مریم صفدر ڈان لیکس انا خالق ءِ بھارتی جاسوس کلبھوشن یادیونا ہلنگ آ اوفتا زبان بند مریک، مودی نا سوغندی آ کاہک تو مودی ءِ خوش کننگ کن کشمیری حریت راہشون آتون ملیپک و بھارتی اداکارآتون ملک، برام نا دود اٹی مودی ءِ تو بٹنگ انگک ولے حریت راہشون آتے آخا، نواز شریف لندن اٹ تولوک الطاف حسین ٹو جوڑ مسنے، داتو مودی نا سوغندی دود اٹی بشخ ہلنگ و بھارتی اداکارآتون تو ملاکہ ولے مودی نا پاننگ آ داحریت راہشون آتون ملیتویسس۔ دوشنبے نادے آ تینا ٹویٹ و میڈیا تون گپ وتران اٹی وزیر مملکت حوالکاری و شینکاری فرخ حبیب پارے کہ نواز شریف نا بیانیہ اقتدار اٹ برسا لٹ وپل کننگ ءِ، منی لانڈرنگ و جعلی اکاؤنٹ اونا پہچان ءِ، نواز شریف نا بیانیہ بیرہ شریف خاہوت نا دولت اٹی ودکی ءِ، الس اونا دور اٹ نیزگاری آن نیزگار مس، ن لیگ انا دور اٹی 2کروڑ آن زیات چنااسکول آتیان پیشن ئسر، اونا بیانیہ دادے کہ پیسہ خلسا اقتداراٹی برے، اقتداراٹ برسا پیسہ غاتے ڈبل کبو، ہراتم کس اس اَریفے تو اودے انتقامی کارروائی گوندبو، کنیک تو خَلیک ہم، نا کلہو ءِ او ملک اٹ تس، الس اونا دا بیانیہ تون تفوک اف۔ اوپارے کہ بیانیہ ہمومریک ہراملک انا تہہ ٹی تولسا ملکی سالمیت و شونداری نا مرے، اگہ ملک اٹ بیانیہ اس چلینگ انگ ءِ تو او عمران خان نا بیانیہ ءِ، عمران خان ملکی مفاد اٹی ”ایبسلوٹلی ناٹ“(اسُل)پاتو، عمران خان کشمیری تا سچا وکیل و سفیر جوڑ مس، اومودی و آرایس ایس نا ہندوتوا سوچ ءِ بے نقاب کرے۔ اوپارے کہ بھارت ملک انا تہہ ٹی جلہو کرفے یا کلبھوشن یادیو ءِ ہلنگے تو ن لیگ آنبار چپ سلپ بلکن پاش آن پاش دنیا ءِ پارے کہ بھارت ننا ملک انا تہہ ٹی جلہو کرفنگ ءِ۔ وزیر مملکت فرخ حبیب پارے کہ اونا اُراغا برام آ مودی بریک، اینو کشمیری الس اوڑآن اَریفنگ ءِ کہ او حریت راہشون آتے ہم برام آ بٹنگا یا کشمیر نا آجوئی نا بابت ہیت کرے یا بھارتی فوج انا کشمیری تیا ظلم و جور آ اَریفیسس۔ داتو مودی نا سوغندی دود آ ہناکہ، بھارتی ادارکار آتون ملاکہ و مودی نا پاننگ آ دا حریت راہشون آتون ملیتوکہ۔ اوپارے کہ مریم صفدر اینو کشمیر نا پن انا چیمپیئن مرسا چرینگ انگ ءِ، وخت اس پنجاب، سندھ، سوات نا مسڑ مریک، اونا اسہ دروشم اس اف، مریم سرٹیفائیڈ دروغ تڑاسے ہراپاریکہ کہ لندن تون انت پاکستان اٹی ہم ہچ ءُ جائیداد اس اف، اینو ہراوڑ عمران خان آ تنقید کیک۔ اوپارے کہ نواز شریف نا بھارت نواز بیانیہ ءِ ملک انا تہہ ٹی مریم مون آ دننگ ءِ، ادارہ و اوفتا سروک آتے شست کننگ انگ ءِ، نواز شریف لندن اٹی تولوک الطاف حسین ٹو جوڑ مسنے، او سیم تیا شہید مروک آ اخس مخلوق نا اُراتیا ہنانے، اوپارے کہ پاکستان نا فوج انا قربانیک ءُ، پاکستان نا فوج قربانی تسنے، او قربانی تے سلام پیش کینہ۔
