حضرو۔ 12جولائی (اے پی پی) وزیراعظم پاکستان نا خصوصی کمکار موسمیاتی بدلی ملک امین اسلم پارینے کہ پاکستان وزیراعظم عمران خان نا با اعتماد و متحرک کماشی ٹی شونداری نا مزل آتے طے کننگ ءِ و ہمودے مر اف ہراتم الس نا غٹ مشکل آتا ازالہ ممکن مننگ کیک۔ اوداخیال آتا درشانی ءِ پہتی و رحموں روڈ حضروٹی واٹر فلٹریشن پلانٹ آتا بناءِ کرسا کرے۔ داوخت آ اوڑتون اوار پی ٹی آئی نا ہندی سرکڑدہ غاک ہم ساڑی ئسر۔ ملک امین اسلم پارے کہ مچ آ ضلع نا چانڑدہ بھلا خلق آتے کن سوئی گیس انا منظوری ءِ دوئی کننگانے، ہراڑآ سی ءُ سہ کروڑ روپئی خڑچ بریک داکان بیدس سوئی گیس انا ایلو ڈٹ آتیا اِراارب روپئی خڑچ بریک۔ بھاز زوت دا غٹ ڈٹ آتے پورو کننگک۔ پاکستان تحریک انصاف نا حکومت السی خذمت آ یخین تخک و ہنداجوزہ غان سرشار مرسا ساڑی آ مشن ءِ مون آ دننگ انگ ءِ۔ اوپارے کہ ملک انا زرگزرانی حالیت آک بھاز زوت گچین مریرہ و ساڑی آ ٹک آک اونا پیدواری ءِ کننگ ءُ۔ پی ٹی آئی نا حکومت نا دور اٹی مچ آ ضلع ٹی شونداری کاریم تا جال اس تالان کننگانے و داشونداری بھرمک لس بندغ اسکان سرمننگ ءُ۔ ملک امین اسلم پارے کہ مچ آ ضلع ٹی ساف دیر انا فلٹریشن پلانٹ خلنگ انگ ءِ، تعلیمی ادارہ غاتے اپ گریڈ کننگ انگ ءِ و پوسکن آ تعلیمی ادارہ غاتا بنداو ءِ ہم تخنگ انگ ءِ و داغٹ انا سوب آن ننا ضلع ٹی شونداری نا روشناءُ بشخ اس بناکیک۔
