پاکستان ءِ دیمروئی ءُ وشھالی کراچی ءِ دیمروئی  ءَ گوں بندوک اَنت، کراچی ءِ مردم آنی نہ گیگیں جاور ھال آناں ڈلگچار کنگ بوت نہ کنت، صدرمملکت عارف علوی ءِ مزن تکی دیوان ءِ سروکی ءَ گوں گشتانک 

کراچی۔10جولائی (اے پی پی):صدر مملکت ڈاکٹر عارف علوی  ءَ گوشت کہ پاکستان ءِ دیمروئی ءُ وشھالی کراچی ءِ دیمروئی ءَ گوں بندوک انت، کراچی ءِ مردم آنی نہ گیگیں ھاور ھال آناں ڈلگچار کنگ بوت نہ کنت۔ اے ھیالانی درشانی آئی ءَ شمبے ءِ روچ ءَ گورنر گس ءَ مزن تکی دیوان ءِ سروکی ءَ کنان ءَ کت۔ دیوان ءَ کراچی شہر ءِ بنیاتی کوکا ءِ ھوالگ ءَ  جیڈھ آنی گیواری ءِ واستہ کراچی ٹرانسفارمیشن پلان ءِ  بابت ءَ ھیال ریچی کنگ بوت۔   دیوان ءَ کورونا ءِ نوکیں فیز ءِ سبب ءَ کورونا ءِ گیش بوھوکیں کیس آنی بابت ءَ ھم  تران کنگ بوت۔ دیوان ءَ گورنر سندھ عمران اسماعیل، بنجاھی وزیر منصوبگ بندی ءُ ھاسیں گامگیج اسد عمر ءُ ایم این اے آفتاب صدیقی ءَ بھر زوری کت۔  صدر مملکت ءَ گوشت کہ بنجاھی  حکومت کراچی ءِ جیڈھ گیواری ءِ واستہس وتی جوانیں کرد پیلو کنگ ءَ انت۔    دیوان ءَ اسد عمر ءَ گوشت کہ ملک ءَ کورونا ءِ چارمی فیز  سہرا بوھگ ءَ انت۔ ملک ءَ کورونا ایس او پیز آنی پد ءُ رند کنگ ءُ وائرس ءِ بھارتی نمونگ ءِ سبب ءَ کورونا مریض آنی کساس گیش بوھگ ءَ انت۔   اے موہ ءِ سر ءَ صدر ءِ مملکت ءَ گوشت کہ الس زوتاں زوت وتارا کورونا ءَ چہ رکھینگی ءِ ٹُکہ بجن اَنت۔ الس وائرس ءِ شنگ ءُ تالان ءِ گر ءُ دار ءِ واستہ این سی او سی ءِ داتگیں پنت ءُ شون آناں پد ءُ رند بکن اَنت۔ آئی ءَ گوشت کہ جوانیں پیسلہ کنگ ءَ چہ پاکستان دومی ملک آںی رد ءَ  سکیں ءُ نی گیگیں جاور آں چہ محفوظ بوتگ۔